Qostanaı oblysynda jedel járdem kóligi apatqa ushyrap, feldsher kóz jumdy

QOSTANAI. QazAqparat – «Arqalyq-Torǵaı» avtojolynda Jangeldın aýdandyq aýrýhanasynyń jedel járdem kóligi men «Shevrole Nıva» jeńil avtokóligi soqtyǵysty. Alǵan jaraqatynan feldsher kóz jumdy. Polıtsııa tergeý amaldaryn bastady, dep habarlaıdy QazAqparat tilshisi.

Jol apaty keshe keshke 22.30 shamasynda «Arqalyq-Torǵaı» avtojolynda bolǵan.

«Atalǵan fakti boıynsha QR QK 345-1-baby 3-tarmaǵy boıynsha sotqa deıingi tergeý amaldary bastaldy. Qazirgi ýaqytta saraptama taǵaıyndalǵan», - dep atap ótti Qostanaı oblysy PD baspasóz qyzmeti.

Belgili bolǵandaı, «Shevrole Nıva» júrgizýshisi dala jolymen júrip kele jatyp, manevrdiń qaýipsiz ekenine kóz jetkizbesten, ekinshi joldan basty jolǵa shyǵyp ketken.

Saldarynan Jangeldın ortalyq aýdandyq aýrýhanasynyń sanıtarlyq arnaıy avtokóligi – «ÝAZ»-ben soqtyǵysqan.

«Jol apaty saldarynan «ÝAZ» avtokóliginde bolǵan feldsher kóz jumdy. Áıel alǵan jaraqattarynan aýrýhanada qaıtys boldy. Sanıtarlyq arnaıy kóliktiń júrgizýshisi kóptegen jaraqat alǵan», - dep tolyqtyrdy vedomstvodan.

Júrgizilgen saraptama barysynda «Shervole Nıva» kóliginiń 32 jastaǵy júrgizýshisi mas kúıde bolǵany anyqtaldy.

Instagram jelisinde oblystyq densaýlyq saqtaý basqarmasy marqumnyń otbasyna kóńil aıtty.

«Jangeldın aýdandyq aýrýhanasynyń medbıkesi 1969 jyly týǵan Nursáýle Búrkitbaıqyzy Asqarova bir aýrýhanada úzilissiz jumys istedi. 33 jyl buryn ol Arqalyq medıtsınalyq kolledjin bitirip, osynda jumysqa kelgen. 1989 jyldan bastap «Jangeldın ortalyq aýrýhanasy» KMK túrli bólimshelerinde, sońǵy jyldary emhananyń medbıkesi bolyp jumys istedi. Meıirimdi, aqkóńil jan edi. Áriptesteri men patsıentteriniń esinde óz isiniń mamany bolyp qaldy. Qaıtys bolǵan áriptesimizdiń otbasyna shyn nıetpen kóńil aıtamyz»,- delingen habarlamada.