Qostanaı oblysynda jalǵyzilikti qarııa óz úıinde órtenip ketti

QOSTANAI. QazAqparat – Demalys kúnderi Qostanaı oblysynyń birneshe qalasy men aýdanynda tehnogendik sıpattaǵy tótenshe jaǵdaı órshidi, dep habarlaıdy QazAqparat Qostanaı oblystyq tótenshe jaǵdaılar departamentiniń baspasóz qyzmetine silteme jasap.

«Sarykól aýdanyndaǵy Sarykól aýylynyń shetinde jalǵyzbasty zeınetker turatyn úı órtendi. Ol týraly 23 mamyr tańǵy saǵat 09:19 shamasynda 101 nómirine aýyl turǵyndary habarlady. Órt sóndirýshiler oqıǵa ornyna kelgende, 150 sharshy metr aýmaqtaǵy úıdegi órt jalynǵa oranǵan. Gaz ben tútinnen qorǵaý qyzmeti órtengen ǵımaratqa kirip, bólmelerdiń ishinen 1958 jylǵy úı ıesiniń denesin anyqtady. Órt sóndirýshiler er adamǵa alǵashqy medıtsınalyq járdem kórsetti, biraq oqıǵa ornyna kelip jetken dárigerler er adamnyń ólimin tirkedi», - dep habarlady vedomstvodan.

Órttiń shyǵý sebepterin anyqtaý maqsatynda oqıǵa ornynda mamandar jumys istep jatyr.

Sondaı-aq 22 mamyrda Arqalyq qalasyndaǵy Demchenko kóshesinde ornalasqan kópqabatty úıdiń eki páterinde balkondar men tereze jaqtaýlary órtengen.

Órt sóndirýshiler jalynmen jarty saǵattaı kúresti. Qaza tapqandar men zardap shekkender joq. Órttiń shyǵý sebebi anyqtalý ústinde.

«Bul kúnderi Qostanaıda eki órt oqıǵasy boldy. Saǵat 15:54-te Ál-Farabı kóshesindegi «Bolshevıchka» tigin fabrıkasynyń qasynda 20 sharshy metr aýmaqtaǵy jylý ótetin joldyń oqshaýlamasy órtengen. Órt sóndirýshiler jalyndy saǵat 16:01-de aýyzdyqtap, toǵyz mınýttan keıin tolyq sóndirdi», - dep atap ótti TJD-dan.

Kelesi kúni qalanyń Qobylandy batyr kóshesindegi jastar jelejolynda taǵy bir órt oqıǵasy oryn alǵan. Onda turaqqa qoıylǵan Volga kóligi órtendi. Kóliktiń ishi órtenip ketti.

Avtomobıl oqıǵalary osymen aıaqtalǵan joq. Jeksenbi kúni saǵat 14:34-te Fedorov aýdanyndaǵy Lenın men Janahaı aýyldarynyń arasynda Folksvagen markaly kólik jalyndaı bastaǵan.

Órt saldarynan kóliktiń salony men dóńgelekteri órtenip ketti.

«Qostanaı oblysynyń TJD órt qaýipsizdigi erejelerin qatań saqtaý qajettiligi týraly eskertedi. Órt sóndirýshiler TJ oqıǵasy jaǵdaıynda «101» nemese «112» nómirine habarlasýyńyzdy suraıdy», - dep atap ótti vedomstvodan.