Qostanaı oblysynda jabylyp qalǵan eki qus fabrıkasy qaıta jandanady
Aýyl sharýashylyǵy jáne jer qatynastary basqarmasynyń basshysy Tımýr Bısımbaevtyń aıtýynsha, Qarabalyq aýdanyndaǵy «Komsomol» qus fabrıkasyn qalpyna keltirý jáne jańǵyrtý boıynsha «Poultry-Agro» JShS jobasy iske asyrylýda. Fabrıkanyń jumysy 2013 jyly turalap qalǵan edi. Al 2017 jyly ol bankrotqa ushyrady. Qus fabrıkasynyń Qarabalyq aýdany ákimdigi men «Qazagrofınans» AQ aldyndaǵy qaryzy 3 mlrd teńgege deıin jetken. «Qazagrofınans» AQ bul jobany iske asyrýdy 2009 jyly qolǵa alǵan. Sol kezde ınvestjoba seriktestikke de, memleketke de eshqandaı paıda ákelmegen. Búginde fabrıkanyń barlyq máseleleri sheshildi.
«Jańǵyrtýdyń birinshi kezeńinde jylyna 5 myń tonna broıler etin óndirý josparlanýda, óndiristik qýaty 12,5 myń tonna etti quraıdy. Joba «Qarapaıym zattar ekonomıkasy» baǵdarlamasy arqyly júzege asyrylyp jatyr. Fabrıkanyń búkil óndiristik qurylymyn jańalaýǵa shamamen 5,6 mlrd teńge jumsalady. Nátıjesinde 260 jańa jumys orny paıda bolady», - deıdi Tımýr Bısımbaev.
Sonymen qatar Arqalyq qalasyndaǵy «Agroınterptıtsa» JShS jumysyn qalpyna keltirý sharalary qabyldandy. Kásiporynǵa qyrylyp qalǵan 450 myń qus úshin 482,5 mln teńge ótemaqy tólengen.
Buǵan deıin Arqalyq qalasyndaǵy qala quraýshy kásiporyn «Agroınterqus» JShS jumysyn ýaqytsha toqtatqanyn habarlaǵan edik. Eldegi joǵary patogendi qus tumaýynyń taralýyna baılanysty kásiporynda 502 600 qus qyryldy.
Qus fabrıkasynyń qyzmetin jańǵyrtý maqsatynda kelesi jyldyń 5 qańtarynan bastap 62 myń balapan ósirý josparlanýda. Kezeń-kezeńimen qus sany 420 myńǵa deıin jetkizilmek.