Qostanaı oblysynda Volonter jyly nesimen este qaldy

QOSTANAI. QazAqparat – Bıyl Qostanaı oblysynyń jastary qalalardy aıtpaǵanda, shalǵaı aýyldarda volonterler qozǵalysyn quryp, kóptegen ıgi bastamalarǵa muryndyq boldy. Qazirgi ýaqytta oblysta 90 volonterlik uıymnyń qyzmeti tirkelgen. Olardyń jumysyn oblys ákimdiginiń jastar saıasaty máseleleri basqarmasy qadaǵalap, baǵyt-baǵdar berip otyrdy, dep habarlaıdy QazAqparat tilshisi.

Qostanaı oblysy volonterliktiń Taza Álem baǵytyn tańdaǵan. Munda qorshaǵan ortany qorǵaý, ózender men ormandardy tazartý, aǵash otyrǵyzý, qaıtalama shıkizattan shyǵarmashylyq ónimder jasaý arqyly halyq ekologııasyn úıretýge basymdyq berilgen. Jalpy volonterlik qozǵalysty qoldaýǵa memlekettik áleýmettik tapsyrys aıasynda 19 jobany júzege asyrýǵa 18,3 mln teńge qarastyrylǵan. Jyl basynan beri 800-den astam is-shara ótkizilip, oǵan 6 myń volonter qatysty.
Rasymen de erikti jastardyń oblys turǵyndaryna tıgizgen kómekteri kóp boldy. Jastar kómegi elimizde tótenshe jaǵdaı engizilip, karantın rejımi bastalǵan shaqta sezildi. Nátıjesinde Qostanaı oblysynyń ár aýdanynda volonterler jastaqtary quryldy. Olar shekteý sharalaryn saqtaýdyń mańyzdylyǵyn túsindirý jumystaryna da belsendi atsalysyp keledi. Volonterler polıtsııa qyzmetkerlerimen birlesip, karantın sharalaryn saqtaý týraly paraqsha, medıtsınalyq maska men azyq-túlik taratty.

Volonter jasaqtary aýdandyq aýrýhanamen de tyǵyz baılanysta bolyp, tótenshe jaǵdaı kezeńinde zeınetkerlerge jáne aýrýhanada esepte turǵan jalǵyzbasty adamdarǵa dári-dármek tasymaldaýdy uıymdastyrdy.

Qostanaı qalasynyń emhanalary ottegi toltyrylǵan ballondardy, dári-dármek tasý jumysyna adam qajet ekenin aıtyp, áleýmettik jelige jazba qaldyrǵan. Osy jyldyń 11 shildesinen bastap Qostanaı oblysy ákimdiginiń jastar saıasaty máseleleri jónindegi basqarmasy tıisti kómek kórsetý úshin qala eriktileriniń jıynyn uıymdastyrdy.
«Osynaý qıyn shaqta birlik tanytýymyz qajet. Sonda ǵana qaýipti indetti jeńemiz. Qazir vırýspen kúreste dárigerlerdiń aldyńǵy shepte júrgeni málim. Sol sebepti bizdiń basqarma oblys turǵyndaryna úndeý jarııalap, kómektesýge shaqyrdy. Bul úndeýge ártúrli jastaǵy, túrli kásip ókilderi ún qatty. Máselen, birinshi kúnnen bastap mádenıet qyzmetkerleri, jeke kásipkerler, stýdentter, órt sóndirýshiler bizben birge. Qazir ottegi ballondaryn emhanalarǵa jetkizý jumystarymen aınalysyp júrmiz. Mundaı jumys jalǵasady», - deıdi agenttik tilshisine basqarma basshysynyń orynbasary Saıat Shaımurynov.

Ras, qostanaılyq volonterler jumys tańdap jatqan joq. Eriktiler kómek kerek shaqta qara jumystan qashpady. Solardyń biri – kásipker Nurjan Sárinjipov.
«Biz jazda dostarymyzben birigip aýrýhanalarǵa kómek kórsetýdi uıǵardyq. Qalalyq aýrýhananyń bazasynda jumys istedik. Qolymyz qalt etkende medıtsına qyzmetkerlerine kómektesýge ýáde ettik. Ákimdik, ıá bolmasa, aýrýhana basshylyǵynyń nusqaýy bolǵan emes. Áleýmettik jelilerden eriktilerdiń usynysyn kórip, qabyl aldyq. Bir ottegi ballony naýqasqa tezirek jetse degen tilek qana boldy. Qoldan kelgenshe kómekti aıamaımyz. Negizi volonterlerdiń jumysy osy jylmen toqtap qalmaıdy. Seń qozǵaldy, endigi jyly da eriktilik qyzmetimiz jalǵasady», - deıdi kásipker.
Ooblys ákimi Arhımed Muhambetov qıyn shaqta qol ushyn sozǵan qostanaılyq eriktilerdi marapattady. Aımaq ákiminiń sózinshe pandemııa kezinde eriktiler oblys ortalyǵyndaǵy 5 emhanadan 6 myń mekenjaıǵa dári-dármek jetkizgen. 200-den astam volonter provızorlyq statsıonarlarǵa ákelingen ottegi ballony men ókpege jasandy jolmen aýa jiberetin apparattardy túsirý, ǵımaratqa kirgizýmen aınalysty.
«Volonterler tótenshe jaǵdaı kezinde dári-dármekten basqa, muqtaj adamdarǵa qajetti azyq-túlikti jetkizýge kómektesti. Olar 2 myńnan astam ottegi ballony men 100 tonnanyń ústinde gýmanıtarlyq kómekke kelgen zattardy túsirdi. Medıtsına qyzmetkerlerin qoldaý maqsatynda «Myń alǵys» aktsııasy uıymdastyrylyp, shara aıasynda 600-den astam medıtsına qyzmetkerine azyq-túlik túrinde kómek kórsetildi. Olardy da eriktiler tasyp berdi. Qaýipsizdik maqsatynda tasymaldaý kezinde barlyq eriktiler betperde, qolǵap jáne qorǵanys kostıýmderimen qamtamasyz etildi. Volonterler qozǵalysynyń barlyq ókiline birlesken jumysy úshin alǵys aıtamyn», – dedi oblys ákimi A.Muhambetov Volonter jylynyń jabylý saltanatynda.
Búginde aımaqta 90 volonterlik uıym bar. Qazvolunteer.kz saıtynda Qostanaı oblysynda bilim alyp jatqan 1 125 stýdent jáne 60 uıym tirkelgen. Oblys ortalyǵynda volonterler qozǵalysyn úılestirip, baǵyttap otyratyn front-ofıs jumys isteıdi. Ofıs qyzmetkerleri ózara kómek kórsetý maqsatynda jasaǵan vlo.kz onlaın servısi arqyly oblys turǵyndarynyń qandaı da bir kómek alýyna nemese kómek usynýyna múmkindik qarastyrylǵan.

Oblystyq jastar saıasaty basqarmasynyń basshysy Marat Jurqabaev aıtqandaı, aımaqta volonterlik qozǵalystyń 2025 jylǵa deıingi damý tujyrymdamasy ázirlenedi.
«Búginde elimizde volonterlik qozǵalys tolyqqandy qalyptasty. Alaıda eriktilerge qarjylandyrý, ǵımaratpen qamtamasyz etý sııaqty júıeli qoldaý kórsetilý kerek. Sondyqtan 2021 jyly oblystaǵy volonterlik qozǵalysty damytýdyń tujyrymdamasy ázirlenýi tıis», – dedi Marat Jurqabaev.
Volonterlerdiń el úshin etken eleýli eńbegi eskerýsiz qalǵan emes. Buǵan deıin qostanaılyq 122 volonter Tuńǵysh Prezıdent Nursultan Nazarbaevtyń Alǵys hatyna ıe bolǵan.
Qostanaı oblysynda «Jyl eriktisi» halyqaralyq syılyǵyn Jangeldın aýdanynyń «Jalyn» jastar uıymy, «Jomart júrek» syılyǵyn kásipker Borıs Knıazev ıelendi. «Jyldyń úzdik uıymy» atalymynda «Olja-Agro» JShS jeńiske jetse, «Eren erlik» syılyǵy 17 jasar Janseıit Qurmanǵalıevke berildi.
«Men volonterlermen birge dári-dármekterdi tasymaldaýǵa jáne jeke qorǵanys quraldaryn túsirýge belsendi kómek kórsettim. Arnaıy otrıadtar quramynda joǵalǵan adamdardy izdeýge, ekologııalyq aktsııalarǵa qatystym. Osy eńbegimdi baǵalaǵan kisilerge alǵysym zor», - deıdi volonter.
Sonymen, Qostanaı óńiriniń volonter jastary jaqsy kórsetkishterge qol jetkizdi. Olar munymen toqtap qalmaı, atqarýshy bılikke ózderiniń jobalaryn usynbaq. Al ákimdik olardy qoldap, materıaldyq jaǵynan qoldaý kórsetýge daıyn.