Qostanaı oblysynda úıi órtengen turǵyndardyń jıhazy men múlkin ótep beremiz – Prezıdent

NUR-SULTAN. QazAqparat – Qostanaı oblysynda úıi órtengen turǵyndarǵa jıhazy men múlki ótep beriledi. Tótenshe jaǵdaı oshaǵyndaǵy eriktilermen kezdesken Prezıdent Qasym-Jomart Toqaev osylaıdep málim etti, dep habarlaıdy QazAqparat tilshisi.

«Eriktilerimizge kóp rahmet aıtamyn. Úlken jumys tyndyryp jatyrsyzdar, qanshama azyq-túlik jınaǵansyzdar?! Bizge shamamen 2,5 aı kerek. Ár zardap shekken – baspanasyz qalǵan adam jańa úı alady. Onyń kólemi 100 sharshy metr bolady. Al úıdiń ishindegi dúnıe-múlik – jıhaz, teledıdar, ydys-aıaq sııaqty dúnıeler de memleket esebinen, materıaldyq-qarjylaı kómek berýge múmkindigi bar adamdardyń járdemimen óteledi»,- degen Prezıdent eriktilerdiń eńbegine sheksiz rıza ekenin jetkizdi.

«Árıne, eriktilerge kóp-kóp rahmet aıtamyn. Sizder elimizdiń naǵyz azamatysyzdar, patrıotsyzdar. Men sizderdi maqtan etemin!», - dedi Memleket basshysy.

Eske salaıyq, Qostanaı oblysynyń Áýlıekól aýdanynda orman órti 2 qyrkúıek kúni bastaldy. Birneshe aýyldan 1841 adam evakýatsııalandy. Tilsiz jaý 86 jastaǵy turǵynnyń ómirin jalmady. 10 adam jaraqat aldy, onyń tórteýi qazir aýrýhanada jatyr.

Qostanaı oblysynda Ahmet Baıtursynulynyń 150 jyldyq mereıtoıyna oraılastyrylǵan saltanatty sharalar keıinge shegerildi. Іs-sharalarǵa Prezıdent Qasym-Jomart Toqaev baratyny josparlanǵan edi. Memleket basshysynyń baspasóz hatshysy Rýslan Jeldibaı Facebook-tegi paraqshasynda QR Prezıdenti orman órtine qaramastan Qostanaı oblysyna jumys saparymen baratynyn aıtty.

Búgin Q.Toqaev óńirge bardy. Órt bolǵan eldi meken turǵyndarymen kezdesken Prezıdent zardap shegýshilerge Úkimet eki aıda burynǵydan da jaqsy úıler salyp beretinin aıtty. Órtti aýyzdyqtaýǵa júzdegen tehnıka, myńdaǵan adammen birge 7 birdeı tikushaq tartyldy.

QR Tótenshe jaǵdaılar mınıstri ıÝrıı Ilın Qostanaı oblysyndaǵy ó rt adam qolynan boldy degen nusqany joqqa shyǵarmaıtynyn málim etti.

Zardap shekken qostanaılyqtarǵa kómek berý úshin biryńǵaı qoǵamdyq qor quryldy.

Óńirdegi jaǵdaı turaqtalǵansha, 3 myńnan astam oqýshy qashyqtan bilim alatyn boldy.

Áýlıekól aýdanyndaǵy órt saldarynan Amanqaraǵaı aýylynda 98 úı órtenip ketti.

Óńirde tótenshe jaǵdaı rejımi jarııalandy.

Úıleri órtenip ketken qostanaılyqtardyń banktegi nesıeleri jabylady.

Foto:akorda.kz