Qostanaı oblysynda túrmede «Ashyq» júıesi iske qosyldy

QOSTANAI. QazAqparat – Qostanaı oblysyndaǵy qonys kolonııasynda Ashyq júıesi iske qosyldy. Bul týraly QR Іshki ister mınıstrligi oblystyq Qylmystyq-atqarý júıesi departamentinen málim etti, dep habarlaıdy QazAqparat.

Endi Qostanaı qalasyndaǵy qaýipsizdigi barynsha tómen ÝK-161/11 mekemesine kirý úshin arnaıy QR-kodty skanerlep, kirerde Ashyq júıesi boıynsha mártebeni kórsetý talap etiledi.

Qosymsha, óz kezeginde, koronavırýsqa qatysty qyzyl, sary, kók jáne jasyl tústerge bólinetin mártebeni kórsetedi.

«Mártebelerdiń kórsetilip otyrýy jumysty jalǵastyrýǵa jáne mekeme qyzmetkerleri men sottalǵandarǵa qaýip tóndirmeýge múmkindik beredi», - dep túsindirdi vedomstvodan.

Buǵan deıin ÝK-161/11 mekemesine kirý PTR-testiniń teris nátıjesin kórsetý arqyly iske asyrylyp keldi.