Qostanaı oblysynda túngi ýaqytta jumys istegen dámhanalar anyqtaldy

QOSTANAI. QazAqparat – Qostanaı oblysynda karantın sharalaryna qaramastan dámhanalar men qoǵamdyq tamaqtaný oryndary jumys istep kelgen. Arnaıy monıtorıng top turǵyndardy shekteý sharalaryna salǵyrt qaramaýǵa shaqyrady, dep habarlaıdy QazAqparat oblystyq polıtsııa departamentiniń baspasóz qyzmetine silteme jasap.

16 qarashadan bastap oblys kóleminde karantındik shekteýler kúsheıtilgen bolatyn. Osy oraıda monıtorıngtik top músheleri ortaq tártipti buzýǵa jol bermeý maqsatynda orta jáne shaǵyn bıznes nysandaryn tekserýdi jalǵastyryp keledi.

Engizilgen erejege saı, túngi ýaqytta taǵam satatyn dúńgirshekter qyzmeti 21:00-de toqtap, tapsyrys jetkizýge 22:00- ge deıin ǵana ruqsat berilgen. Soǵan qaramastan dámhanalar men tamaqtaný oryndary shekteý sharalaryn oryndamaı, jumys istep kelgen.

Oblysta osy kúnge deıin sanıtarlyq-epıdemıologııalyq talap buzýshylyqtyń 5300-ge jýyq deregi tirkelip, 1400-den astam hattama toltyryldy. Jalpy sany 900-ge jýyq aıyppul salyndy.

Aıta keteıik, búgingi tańda Qostanaıda jeti monıtorıngtik top qurylǵan. Olar kún saıyn karantın rejıminiń saqtalýyn qadaǵalaıdy.

«16 qarashada sanıtarlyq beketterde 11773 avtokólik tekserildi. Oblysqa sebepsiz kirý faktisi boıynsha QR Memlekettik shekarasynda 1 avtomashına keri qaıtaryldy. Shekaraǵa kelgen avtokólikti tekserý kezinde KVI belgileri bar adamdar anyqtalǵan joq. Monıtorıngtik toptardyń málimetinshe, keshe karantın rejımi 90 ret buzylǵan. Jumys oryndarynda maskasyz júrgenderge, tyıym salynǵan ýaqyttan keıin jumys istegen dámhanalar men tamaqtaný oryndaryna eskertý jasaldy. Saǵat 22.00-den keıin retsiz kóshede júrgender anyqtaldy», delingen polıtsııanyń habarlamasynda.