Qostanaı oblysynda Táýelsizdiktiń 30 jyldyǵyna arnalǵan jobalar bastaldy
Qostanaı oblysynda Táýelsizdiktiń 30 jyldyǵyna baılanysty keshendi sharalar josparlanǵan. Olardyń júzege asýyna jergilikti atqarýshy bılik ókilderi ǵana emes, úkimettik emes uıymdar da belsendi atsalysýda. «Sanaly urpaq-2050» qoǵamdyq qorynyń jetekshisi Nurbek Ábdibekovtiń aıtýynsha, úkimettik emes uıymdardyń áleýmettik jobalardy qolǵa alýyna aıtarlyqtaı múmkindik berilip otyr.
«Bul eldiń ishki saıasatyndaǵy, ekonomıka jáne áleýmettik-mádenı saladaǵy ÚEU-dyń mańyzynyń artqanyn kórsetedi. Bylaısha aıtqanda, atqarýshy organdar pen turǵyndar arasyndaǵy deldal qyzmetin atqarýda. Bıyl biz «Táýelsizdik taǵylymy», «Shejir ǵumyr», «Táýelsizdik tulǵalary» atty aýqymdy jobalardy bastadyq. «Táýelsizdik taǵylymy» jobasy boıynsha jumys 2021 jyldyń aqpan-jeltoqsan aılary aralyǵynda júrgiziledi. Joba QR Táýelsizdiginiń 30 jyldyǵyna arnalmaq. Onyń máni – el tabıǵatyn, onyń tarıhı eskertkishterin, sporttaǵy, ekonomıka men mádenıettegi jetistikterin kórsetý. Sondaı-aq respýblıkalyq jáne oblystyq dárejege ıe sarapshylardy shaqyryp, kezdesýler uıymdastyramyz. Qostanaı oblysynyń Táýelsizdik jyldaryndaǵy on jetistigin usynbaqpyz», - deıdi Nurbek Ábdibekov.
«Shejire ǵumyr» aktsııasy barysynda onlaın-kezdesýler, konkýrstar, semınarlar, dóńgelek ústelder sııaqty tanymdyq is-sharalar toptamasy usynylady. Uıymdastyrýshylar táýelsizdik taqyrybyna qatysty zııatkerlik oıyn ótkizedi. «Qazaq eli shejiresi» taqyrybyna beınematerıaldar baıqaýy jarııalanyp, Qostanaı oblysynyń qurmetti tulǵalaryna arnalǵan dóńgelek ústelder ótedi. Joba qazirdiń ózinde bastalyp ketti.