Qostanaı oblysynda sıyrlardyń aǵzasyna «aqyldy» qurylǵylar engizilýde
Oblystyq ákimdikte ótken selektorlyq otyrysta aýyl sharýashylyǵy basqarmasynyń tsıfrlandyrýǵa baılanysty esebi tyńdaldy. Jalpy, óńirde agroóndiristik keshendi (AÓK) tsıfrlandyrý boıynsha 29 iri joba qolǵa alynǵan. Búginge deıin bul baǵytta 15 is-shara ótkizildi.
«Oblysta AÓK-ni tsıfrlandyrý pılottyq jobasyna qatysýǵa múmkindigi bar 20 kásiporyn iriktelip alyndy. Solardyń biri - «Astyq ındýstrııasy» agroholdıngi óz bazasynda birneshe jańashyldyq usyndy. Agroholdıng maldardy chıpteý jumysyn bastap ketti. Bul ádis arqyly asyl tuqymdy maldyń urlanbaýy kompıýterden qadaǵalanady. Sharýashylyq qazirdiń ózinde 20 myń chıp satyp alǵan. Buǵan 7 mln teńge qarjy bólindi. Sondaı-aq, mundaǵy bordaqylaý alańy da ozyq tehnologııa boıynsha jabdyqtaldy. Tsıfrlandyrý boıynsha «Jas-Qanat 2006», «Qarqyn» sııaqty sharýashylyqtardyń jetistikterin atap ótýge bolady», - dedi oblystyq Aýyl sharýashylyǵy basqarmasynyń basshysy Darhan Ábdikárimov.
Jaqynda «Aqyldy sút fermasy» jobasyn Qostanaıda engizý úshin Avstrııa elinen sarapshy mamandar arnaıy shaqyrtyldy. Olar oblystaǵy «Sadchıkov» JShS-ny Smaxtec baǵdarlamalyq-apparattyq júıesine qosty. Bul tehnologııanyń artyqshylyǵy mynada: «bolıýs» atty arnaıy qurylǵy sıyrlardyń aýyz qýysy arqyly qarnyna jiberilip, sol arqyly janýardyń jalpy jaǵdaıyn, negizgi fızıologııalyq parametrlerin tolyqtaı baqylap otyrýǵa bolady. Ár bes mınýt sıyn temperatýra qadaǵalaýda bolady. Bul janýardyń aýrý-syrqaýynyń aldyn alýǵa arnalǵan tyń tásil. Sondaı-aq, qurylǵy qozǵalys belsendiligi týraly aqparat berip otyrady. Ol arqyly sıyrdyń uryqtandyrýǵa ázirligi anyqtalady. Álem boıynsha ázirge teńdesi joq osynaý «bolıýs» qurylǵysy, shamamen, sıyrdyń ishki qurylysynda bes jylǵa deıin saqtalady. Osylaısha, óńirdi sút ónimderimen qamsyzdandyryp otyrǵan fermalardyń biri - «Sadchıkov» seriktestigi el boıynsha bul tyń tehnologııany eń alǵashqy bolyp qoldanysqa engizdi. Eger bári oıdaǵydaı bolsa, «bolıýsty» fermadaǵy barlyq 740 sıyrǵa ornatpaq.
Basqarma basshysy aýyl sharýashylyǵyn tsıfrlandyrý boıynsha keı aýdandarda birde-bir jobanyń iske aspaǵanyn da atap ótti. Al belsendi jumys istegen Fedorov, Qostanaı, Qarabalyq, Meńdiqara, Qarasý aýdandary jospardy tolyǵymen oryndaǵan.