Qostanaı oblysynda shalǵaıdaǵy aýylǵa aýyz sý tartyldy

  QOSTANAI. QazAqparat - Qostanaı oblysynda «Nurly jol» baǵdarlamasy sheńberinde qolǵa alynǵan kezekti nysan el ıgiligine berildi, dep habarlaıdy «QazAqparat» HAA tilshisi.

Táýelsizdik kúni paıdalanýǵa berilgen kelesi nysan - Jitiqara aýdanynyń Yrsaı aýylyndaǵy aýyz sý qubyry jelisi. Ashylý saltanatyna qatysqan oblys ákimi Arxımed Muxambetov aýyz sýǵa 170 otbasynyń qoly jetkenin aıtty.
 

«Jańadan iske qosylyp jatqan aýyz sý qubyry jelisi sizderdiń kópten kútken armandaryńyz edi. Al munyń ashylýy Táýelsizdik kúnimen tuspa-tus kelip otyr. Aıtýly merekege tartý dep qabyldańyzdar», - dedi Arhımed Muhambetov.

«JitiqaraKommýnEnergo» mekemesiniń dırektory Myrzabaı Erekenovtiń aıtýynsha, aýyz sý qubyry jelisin salýǵa ulttyq qordan 270,9 mln teńge bólingen. Bıyl sol qarajattyń 244,6 mln teńgesi ıgerilip otyr. Qubyrdyń jalpy uzyndyǵy - 13,7 shaqyrym. Onyń 10 shaqyrymy magıstraldyq jeli, al 3,7 shaqyrymy sý taratýshy bólikten turady. Barlyq qurylys jumystaryn qostanaılyq merdiger atqarǵan.