Qostanaı oblysynda polıtseılerdiń biryńǵaı qabyldaý kúni ótedi
Polıtsııa basshylyǵy 20 mamyrda oblystyń barlyq qala-aýdanynda azamattardy bir mezette qabyldaıdy. Іs-shara «2019-2021 jyldarǵa arnalǵan Іshki ister organdaryn jańǵyrtý jónindegi jol kartasyn» iske asyrý sheńberinde ótkiziledi. Onda jurtshylyqpen tıimdi ózara is-qımyl, halyqpen jumystyń jańa formaty bekitilgen bolatyn. Atalmysh shara aýmaqtardaǵy front-keńselerde ótedi.
«Ár aýdan-qaladaǵy polıtsııa bólimderiniń basshylary turǵyndarmen ózderi kezdesedi. Kópten beri sheshilmeı kele jatqan kúrdeli máseleler týrasynda zań turǵysynda keńester beriledi. Aýyldyq jerlerde azamattardy qabyldaýǵa erekshe nazar aýdarylatyn bolady. Oblystyq departament bastyǵy Beket Aımaǵambetov te turǵyndardy jeke suraqtarymen qabyldaıdy», - dep atap ótti oblystyq Polıtsııa departamentiniń baspasóz hatshysy Irına Bejenar.
Onyń aıtýynsha, mundaı aýqymdy shara oblysta birinshi ret qolǵa alyndy.
Eske salsaq, byltyr Qostanaı oblysynyń 13 aýdan jáne qalasyndaǵy polıtsııa bólimshilerinde front-keńseler ashyldy.
Elbasynyń Joldaýyn júzege asyrý barysynda ashylǵan front-ofıstiń maqsaty - sybaılas jemqorlyqqa jol bermeý, azamattarǵa yńǵaıly qyzmet kórsetý, ótinishterdi qaraý merzimin qysqartý.