Qostanaı oblysynda muǵalimderdiń materıaldyq jaǵdaıyn jaqsartýǵa 14,1 mlrd teńge bólindi

QOSTANAI.QazAqparat – Qostanaı oblysynyń ákimi Arhımed Muhambetov aımaqtyń úzdik pedagogterin marapattady, dep habarlaıdy QazAqparat tilshisi.

Saltanatty shara oblystyq fılarmonıaınyń májilis zalynda ótti. Jıyn barysynda tórt muǵalim «Qazaqstan Respýblıkasy Bilim berý isiniń qurmetti qyzmetkeri» atansa, eki ustaz «Y.Altynsarın» tósbelgisin taqty. 120 muǵalim Bilim jáne ǵylym mınıstrliginiń gramotalary men alǵys hattaryna ıe bolyp, 153 pedagogke oblystyq Bilim basqarmasynyń marapattary tabys etildi.

«Qostanaı oblysynda 20 myńnan astam muǵalim eńbek etedi. Bıyl bilim berý salasy 417 jas mamanmen tolyǵyp otyr. Olardyń kóbi búginde aýyl mektepterinde eńbek etip jatyr. Jas mamandarǵa barynsha qoldaý kórsetiledi. Bıyl oblysta «Pedagog mártebesi týraly» zań talaptaryn júzege asyrý úshin, olardyń materıaldyq jaǵdaıyn jaqsartýǵa 14,1 mlrd teńge qarastyrylyp otyr. Qomaqty qarjynyń basym bóligi muǵalimderdiń jalaqysyn kóterýge jumsalady. Bıyl qańtardan bastap muǵalimderdiń aılyq tabysy 25%-ǵa óskenin bilesizder. Sizderdiń shákirt tárbıeleý jolyndaǵy eńbekterińiz elene bersin!» - dedi oblys ákimi shara barysynda.

Sondaı-aq jıynda «Úzdik pedagog» respýblıkalyq baıqaýynyń oblystyq kezeńinde úzdik shyqqan 6 muǵalim marapattaldy. Aımaq basshysy jeńimpazdardyń qolyna 833 myń 400 teńgeniń sertıfıkattaryn tapsyrdy.

Merekelik sharadan soń QR Bilim jáne ǵylym mınıstri Ashat Aımaǵambetov óńirlermen tikeleı baılanysqa shyǵyp, «Úzdik pedagog» respýblıkalyq baıqaýynyń jeńimpazdaryn quttyqtady. Oblystyq kezeńde ozyp shyqqan 6 jeńimpazdyń 4-eýi respýblıka úzdikteriniń qatarynan kórindi. Jeńimpazdarǵa taǵaıyndalǵan 2 mln 778 myń teńgelik syıaqyny oblys ákiminiń orynbasary Baqyt Esimova tabys etti.