Qostanaı oblysynda memlekettik qyzmetshilerdiń damý kartasy jasalmaq

QOSTANAI. QazAqparat – Qostanaı oblysynyń memlekettik qyzmetshileri aldaǵy mansabyn josparlaýǵa múmkindik aldy. Bul týraly oblystyq memlekettik qyzmet isteri departamenti basshysynyń orynbasary Erlan Salyqbaev Rýdnyı qalasynda ótken dóńgelek ústel barysynda málimdedi, dep habarlaıdy QazAqparat.

Jıynǵa Memlekettik qyzmet personalyn basqarý ulttyq ortalyǵynyń dırektory Baný Nurǵazıeva qatysty. Shara bastalmas buryn oblystyń memlekettik qyzmetshileri arasynda saýalnama júrgizilgen bolatyn. Bul saýalnama arqyly árbir memlekettik qyzmetker mansabyn josparlaýǵa múmkindik alady.

«Mundaı mehanızmdi engizý qyzmetinde ósýdi armandaıtyn memlekettik qyzmetshilerge múmkindik beredi. Máselen, Lısakov qalasyndaǵy memlekettik organda bos oryn paıda bolsa, oǵan shalǵaıdaǵy Jankeldın aýdanynyń qyzmetkeri jumysqa tura alady. Bul kez kelgen memlekettik organdarynda jas mamandardyń kásibı damýy men laýazymdyq joǵarylaýyna áser etedi. Olar tek saýalnama toltyrsa bolǵany», - dep túsindirdi Erlan Salyqbaev.

Atalmysh bastama aıasynda departamenttegiler damý kartasyn jasady. Damý kartalary ishki konkýrstar ótkizý josparlanyp otyrǵan memlekettik organdardyń atyna jiberiledi. Tıisinshe, jobaǵa qatysýshy memlekettik qyzmetker karta arqyly baǵalanady.

Sonymen qatar, saýalnama arqyly konkýrstan ótken qyzmetker organ basshysymen «Onlaın áńgimelesýge» qatysady. Eger áńgimelesýden sátti ótse, jumysqa qabyldanady.

Erlan Salyqbaev atap ótkendeı, batys elderinde bul ádis memlekettik qyzmetshiniń eńbegin obektıvti baǵalaýdyń tetigi sanalady. Ol jas mamandarǵa mansaptyq ilgerileýge kepildik beredi.