Qostanaı oblysynda Májilis depýtattyǵyna úmitkerler belgili boldy
«Nur Otan» partııasy Qostanaı oblystyq fılıalynyń 150 delegaty 23 úmitkerdi iriktep, daýys berdi. Árbir delegat birneshe úmitkerge daýys berýge múmkindik aldy.
«Bıyl partııa tarapynan aýqymdy jumys jasalyp otyr. Jaqynda ǵana partııaishilik saılaý – praımerız ótken bolatyn. Sonyń jalǵasy retinde búgingi konferentsııamyzdy ótkizip otyrmyz. Jalpy, praımerızge qatysý úshin oblysta 843 adam tirkelgen. Sonyń ishinde 43% (362) áıelder, 30% (249) 35 jasqa deıingi jastar. Qatysýshylardyń ortasha jasy – 43 jas. Bastaýysh partııa uıymdarynan 244 azamat usynylsa, 600 adam ózin-ózi usyndy», - dedi óz sózinde oblys ákimi, «Nur Otan» partııasynyń Qostanaı oblystyq fılıaly tóraǵasy Arhımed Muhambetov.
Saılaýǵa partııanyń kadr rezervinen 584 adam usynylǵan. Onlaın daýys berý aldynda barlyq kandıdattar pikirsaıysqa qatysty. Pikirsaıys barysy partııanyń oblystyq fılıalynyń áleýmettik jelilerdegi resmı akkaýntynda tikeleı efırde kórsetildi.
Úsh mınýt ishinde úmitkerler ózderiniń saılaýaldy baǵdarlamalarynyń basymdyqtary týraly aıtyp, sodan keıin bir mınýt ishinde áriptesteriniń suraqtaryna jaýap berýi kerek boldy.
Jalpy, praımerız kezinde 800-ge jýyq baǵdarlama ázirlendi, onyń árqaısysynda azamattardyń ómirin jaqsartý boıynsha naqty usynystar bar.
Konferentsııa delegattarynyń onlaın-daýys berý nátıjeleri boıynsha eń kóp daýys jınaǵandar qatarynda Ekaterına Smyshlıaeva (144 daýys), Samat Aqyshev (128), Qyrmyzy Jańbyrshına (103), Ádil Aǵaısınder (91) boldy.
Konferentsııa sanıtarlyq-epıdemıologııalyq talaptardy qatań saqtaı otyryp ótti. Sondaı-aq onyń barlyq qatysýshylary mindetti PTR synaǵynan ótken bolatyn.