Qostanaı oblysynda KVI juqtyrǵan balalar men jasóspirimder sany artýda

QOSTANAI. QazAqparat – Qostanaı oblysynyń bas sanıtarlyq dárigeri Ermuhanbet Dáýletbaev aımaqtyq kommýnıkatsııalar qyzmetinde ótken brıfıngide óńirde jasóspirimder men júkti áıelderdi aldaǵy ýaqytta vaktsınalaý týraly aıtty, dep habarlaıdy QazAqparat.

Bas dáriger osy aıda 12 jastan asqan balalarǵa, sondaı-aq júkti áıelder men emizýli analarǵa erikti túrde ekpe salyna bastaıtyny jaıynda eske saldy. Balalardy vaktsınalaý qajettiligi sońǵy birneshe aıda aýrý juqtyrý kórsetkishteriniń joǵarylaýynan týyndap otyr.

«Vaktsınalaý erikti túrde júrgiziledi, balalarǵa ekpe ata-analary men qamqorshylarynyń kelisimimen ǵana salynady. Ókinishke qaraı, sońǵy aılarda biz únemi «qyzyl» aımaqta bolýdamyz, jalpy statıstıkada jasóspirimderdiń aýrýǵa shaldyǵýynyń úlesi artyp otyr. Eger buǵan deıin oblysta qańtar aıynan bastap balalardyń aýrýǵa shaldyǵý kórsetkishi 9 paıyz bolsa, qańtarda 17 paıyz, al qazan aıynda 24,5 paıyzǵa deıin joǵarylaǵan. Sondyqtan balalardy vaktsınalaý qajet bolyp otyr», - dedi E.Dáýletbaev.

Bas dáriger azamattar balalarǵa ekpe saldyrtýǵa májbúrlenbeıtinin, alaıda vedomstvo qalyptasqan epıdemıologııalyq jaǵdaıdy eskere otyryp, jaǵdaıǵa túsinistik tanytýyn surap otyrǵanyn túsindirdi. Buǵan deıin Qostanaı oblysynda KVI-ǵa qarsy ekpeni turǵyndardyń tek 60 paıyzy ǵana salǵyzǵany habarlanǵan. Sonymen birge aýrý juqtyrǵan balalar men júkti áıelderdiń sany artyp keledi. Qazan aıynyń sońynda qaýipti vırýstan 443 bala em alǵan.