Qostanaı oblysynda qurylys dúkenine «bomba qoıyldy»

QOSTANAI.QazAqparat – Qostanaı oblysynyń polıtsııa departamenti qurylys dúkenindegi jarylǵysh zat týraly habarlamany tekserip jatyr, dep habarlaıdy QazAqparat.

Oblystyq polıtsııa departamentiniń baspasóz hatshysy Irına Bejenardyń aıtýynsha, búgin saǵat 12:00 shamasynda Qostanaı qalasy Karbyshev kóshesiniń boıyndaǵy «Megastroı» qurylys dúkenine «bomba» qoıylǵany týraly habar tústi.

«Oqıǵa ornyna arnaıy qyzmetter jumyldyrylyp, polıtsııaǵa kelip túsken habarlamany tekserý boıynsha qajetti is-sharalar júrgizilýde. Osyndaı sıpattaǵy árbir habarlama keshendi túrde tekseriledi. Ol jalǵan aqparat bolsa da, arnaıy qyzmet ókilderi shaqyrtylady. Sondyqtan oblys turǵyndaryn jeke qaýipsizdik maqsatynda arnaıy qyzmetterdiń jumysyna túsinistikpen qaraýdy suraımyz», - deıdi I.Bejenar.

Aıta keteıik, bul – Qostanaı oblysyndaǵy bir aptadaǵy ekinshi jaǵdaı. Kúni keshe jarylǵysh zat týraly jalǵan habarlama taratqan kúdiktige izdeý salynǵan bolatyn.