Qostanaı oblysynda qazaq halyq aspaptarynyń festıvali ótti

QOSTANAI.QazAqparat – Áýlıekól aýdanynda «Rýhanı jańǵyrý» baǵdarlamasy aıasynda «Babadan qalǵan qazynam» atty qazaq halyq aspaptarynyń aımaqtyq festıvali ótkizildi, dep habarlaıdy QazAqparat.

Іs-sharaǵa Altynsarın, Naýyrzym, Qarasý, Qamysty, Qostanaı aýdandarynyń ónerpazdary qatysty. Áýlıekól aýdany ákimdiginiń mádenıet jáne tilderdi damytý bóliminiń basshysy Jibek Kákimjanqyzy is-sharanyń mańyzyna toqtaldy.

«Qazaq halqynyń ǵasyrlar boıy jınaqtaǵan ulttyq qundylyǵyn osyndaı baǵyttaǵy sharalar aıǵaqtaıdy. Bizdiń basty mıssııamyz – ulttyq kodty saqtaý, jańǵyrtý, nasıhattaý. «Babadan qalǵan qazynam» atty qazaq halyq aspaptarynyń aımaqtyq festıvalin mádenı muramyzdy damytý, aımaqtar arasynda mádenı baılanysty nyǵaıtý men halyq aspaptarynda oınaý dástúrin dáripteý maqsatynda ótkizip otyrmyz», - deıdi bólim basshysy.

Aýdandyq mádenıet úıine jınalǵan ujymdar qazaqtyń mýzykalyq aspaptarynyń ózine tán únin, oryndaýshylyq dástúrin ortaǵa saldy. Festıvaldiń birinshi kezeńinde ansamblder shyǵarmalary oryndaldy. Ansamblder óz shyǵarmalaryn estradalyq baǵytta ǵana emes, sondaı-aq, qazaq halyq aspaptary – asataıaq, shańqobyz, shyldyrmaqtarmen áspettedi. Qarasý aýdany óner mektebinen kelgen «Dala áýeni» ansambli, «Grek kompozıtsııasy» kvarteti, Altynsarın aýdanynan «Ata mura» ansambli, Qostanaı aýdanynan «Kók bóri» etnoansambli, Áýlıekól aýdany óner mektebiniń «Qazyna» etnoansamblderi jaqsy óner kórsetti.

Ekinshi kezeńde jekeleı oryndaýshylar baq synady. Úzdik shyqqandar baǵaly syılyqtarmen jáne gramotalarmen marapattaldy.