Qostanaı oblysynda qar qursaýynda qalǵan 35 jolaýshy qutqaryldy

QOSTANAI. QazAqparat - Ótken aptada Qostanaı oblysy trassalarynda 7 avarııalyq-qutqarý jumysy júrgizildi. Qar qursaýynan 35 adam qutqaryldy, dep habarlaıdy QazAqparat.

27 aqpan men 5 naýryz aralyǵynda Qostanaı oblysy TJD aýmaqtyq bólimsheleri Naýyrzym, Jitiqara, Amangeldi, Qamysty aýdandarynda, sondaı-aq Arqalyq qalasynyń mańynda 7 avarııalyq-qutqarý operatsııasyn júrgizdi.

35 adam qutqaryldy, onyń ishinde 9 bala bar.

5 naýryz kúni saǵat 22:15-te qutqarýshylar polıtseılermen birge Amangeldi aýdanynda Qarasý aýylynan 25 shaqyrym jerde joǵalǵan shopandy izdedi.

23:30-da 2004 jylǵy azamat Qarasý aýylynan 12 shaqyrym jerden tabyldy. Medıtsınalyq kómekke muqtaj emes, dereý Qarasý aýylyna jetkizilgen.

Oblystyq tótenshe jaǵdaılar departamentiniń málimetinshe, 4 naýryzda Naýyrzym aýdanynyń aýmaǵynda qolaısyz aýa raıynan Dámdi jáne Qoja aýyldary arasyndaǵy Áýlıekól-Joldama oblystyq mańyzy bar avtojol ýchaskesindegi jaǵdaı ýshyǵyp ketti.

9 jolaýshysy bar 2 jeńil avtokólik qar qursaýynda qaldy. Oqıǵa ornyna № 26 Amangeldi órt sóndirý bóliminiń qyzmetkerleri bardy.

Saǵat 11:15-te Amangeldi qutqarýshylary Qoja aýylyna 3 adamdy jetkizip, jergilikti polıtsııa qyzmetkerlerine tapsyrdy.

Sol tasjoldyń basqa ýchaskesinde Ýshakovo aýylynyń mańynda 13 avtokólik, 10 jeńil jáne 3 júk kóligini kepteliste qalyp qoıdy. Avtokólikterde 15 adam, onyń ishinde 9 bala boldy.

Qutqarylǵan azamattar Áýlıekól aýylyna saǵat 17:05-te jetkizildi.

Aýa raıynyń qolaısyzdyǵyna qaramastan, qutqarý jumysy sátti ótti. Zardap shekkender joq.

112 qyzmeti júrgizýshilerge uzaq sapardan bas tartýǵa keńes beredi.