Qostanaı oblysynda ishimdik satýǵa tyıym salyndy

QOSTANAI. QazAqparat – Qostanaı oblysynda alkogoldik ónimderdi satýǵa tyıym salyndy. Mundaı buıryqqa Qostanaı oblysynyń komendanty Qaırat Dúısembekov qol qoıdy, dep habarlaıdy QazAqparat tilshisi.

«TJ rejımin qamtamasyz etý maqsatynda Qazaqstan Respýblıkasynyń 2003 jylǵy 8 aqpandaǵy №137 «Tótenshe jaǵdaı týraly» Zańynyń 1-baby 2-tarmaǵyna, sondaı-aq Qazaqstan Respýblıkasy Prezıdentiniń 2022 jylǵy 5 qańtardaǵy №743 «Qostanaı oblysynda tótenshe jaǵdaı engizý týraly» Jarlyǵynyń 4-tarmaǵy 7-tarmaqshasyna sáıkes, Qostanaı oblysynyń aýmaǵynda alkogol ónimin barlyq saýda oryndarynda jáne oıyn-saýyq oryndarynda saǵat 7.00-den 2022 jyldyń 19 qańtary saǵat 00.00-ge deıin satýǵa tyıym salyndy», - delingen qujatta.

Osy buıryqtyń oryndalýyn Qostanaı oblysyndaǵy qala jáne aýdan ákimderi baqylaıdy.

Eske salaıyq, Qostanaı oblysynda TJ rejımi engizilgen bolatyn.

Polıtsııa departamentiniń málimetinshe, óńirde qoǵamdyq tártip qalpyna keltirilgen.