Qostanaı oblysynda ınvestıtsııalyq jobalarǵa 251 mlrd teńge jumsalmaq
Buǵan deıin habarlaǵanymyzdaı, Qostanaıda «Kostanay-Invest 2018» ekinshi halyqaralyq ınvestıtsııalyq forýmy óz jumysyn bastady. Forým qatysýshylary aldymen Qostanaı qalasyndaǵy ındýstrııalyq aımaqqa baryp, olar aýyl sharýashylyǵy zaýytynyń jumysymen tanysty. Oblys ákimi Arhımed Muhambetov aıtqandaı, munda "Belarýs" traktorlary qurastyrylady.
Oblystyq fılarmonııada ótken plenarlyq otyrysta aımaqtyń ınvestıtsııalyq múmkindikteri men eksporttyq áleýeti tanystyryldy. «Qostanaı oblysynyń ınvestıtsııalyq áleýeti: keleshegi, jańa múmkindikter men tuǵyrlar» taqyrybyndaǵy májilisti «Talap» qoldanbaly zertteýler ortalyǵynyń dırektory Rahym Oshaqbaev júrgizip otyrdy.
Qostanaı oblysynyń ákimi Arhımed Muhambetov ınvestıtsııalardy tartý salasyndaǵy eń ózekti máselelerdi barlyq múddeli taraptardyń qatysýymen talqylaýdy usyndy. Ol halyqaralyq forýmnyń aımaq úshin mańyzdy ekenine toqtaldy.
«Osymen ekinshi márte ótkizilip otyrǵan bul forým Qostanaı oblysyna ınvestıtsııa quıý múmkindikterin qarastyrýǵa arnalǵan tıimdi alań retinde ózin tanytty. Byltyr 28 ınvestjoba maquldandy. Investıtsııalyq klımatty jaqsartý, ınvestorlarmen ashyq dıalog qurý, ınvestıtsııalardy tartý úshin ınfraqurylymdy jetildirý - munyń bári Qostanaı oblysy ákimdiginiń qyzmetinde basymdyq berilgen baǵyttar. Ózderińizge málim, qazir bizdegi ındýstrııalyq aımaq jaqsy qarqyn aldy. 11 iri jobamyz bar. Onyń 4-eýi bıyl júzege asady», - dep atap ótti oblys ákimi.
Forýmda ınvestıtsııalyq tartymdylyqty jaqsartý jáne kúshterdi biriktirý boıynsha ekijaqty 19 memorandýmǵa qol qoıyldy. Nátıjesinde, jalpy somasy 251 mlrd teńge bolatyn ınvestıtsııalyq joba iske asady. Atap aıtqanda, Qostanaı oblysy ákimdigi men «AYTEI GROUP» Holdıngtik kompanııasy» JShS oblysta tas kesý jáne óńdeýmen, ústeldiń ústińgi taqtaıyn, vanna bólmesine arnalǵan qoljýǵyshtardy, árleýge arnalǵan plıtkalardy jasap shyǵarýmen aınalysatyn zaýytty salý týraly memorandým jasady. Joba quny - 7 mlrd teńge. Sondaı-aq, Qostanaı oblysy jáne «Bio Grain» JShS arasynda Qostanaı oblysy aýmaǵynda dándi jáne maıly daqyldardy qaıta óńdeýge arnalǵan habty salýǵa arnalǵan jol kartasyn qabyldaý josparlanǵan. Buǵan 111 mlrd teńge kózdeldi. Joǵaryda aıtqan «Belarýs» traktorlaryn qurastyrý úshin oblys ákimdigi men «Kompozıt Grýpp» holdıngi kelisimge qol qoıdy.
Aıta keteıik, oblys ákiminiń orynbasary Meıirjan Myrzalıevtiń «QazAqparat» HAA tilshisine bergen suhbatynda syrt elderden tartylǵan ınvestıtsııa kólemi 2 esege óskenin aıtqan bolatyn.
Al byltyrǵy ınvestıtsııalyq forýmda taraptar 200 mlrd teńge bolatyn 26 memorandýmǵa qol qoıǵan edi.