Qostanaı oblysynda elik atqandar ustaldy

QOSTANAI.QazAqparat – Qostanaı oblysynda úsh Sibir eligin atyp alǵan brakonerler ustaldy, dep habarlaıdy QazAqparat oblystyq polıtsııa departamentiniń baspasóz qyzmetine silteme jasap.

Tártip saqshylary reıd kezinde Áýlıekól aýdanyna qarasty Basaman orman alqaby mańynan VAZ-21214 markaly avtokóligi toqtatady. Kólikte Rýdnyı qalasynyń turǵyndary bolǵan.

«Avtokólikti tekserý kezinde polıtsııa qyzmetkerleri sibir eliginiń úsh terisin jáne tirkelmegen ańshylyq qarýdyń eki danasyn tapty. Olarda janýarlardy atýǵa ruqsat qujatynyń joq ekeni anyqtaldy. Polıtsııa tergeý jumystaryn bastady. Bıologııalyq, ballıstıkalyq jáne trasologııalyq saraptamalar taǵaıyndaldy»,- deıdi Qostanaı oblysy PD tabıǵatty qorǵaý polıtsııasy bólimshesiniń aǵa ınspektory Hazretáli Álimǵazın.

Aldyn ala shyǵyn 250 AEK-ke jetip otyr, biraq naqty shyǵyn somasy bıologııalyq saraptamadan keıin anyqtalady.