Qostanaı oblysynda elektrondy densaýlyq pasporty engiziledi

QOSTANAI. QazAqparat - Qostanaı oblysynda elektrondy densaýlyq pasporty engizilmek. Bul týraly óńirlik kommýnıkatsııalar qyzmetinde ótken brıfıngte densaýlyq saqtaý basqarmasy basshysynyń orynbasary Ekaterına Slobodenıýk aıtyp berdi, dep habarlaıdy QazAqparat.

Ekaterına Slobodenıýktiń sózinshe, 2018 jyldyń sońynda oblys turǵyndarynyń teń jartysy  elektrondy densaýlyq pasportyna ıe bolady. Qazirdiń ózinde mundaı qujat 38 myń turǵynda bar.

 «Elektrondy densaýlyq pasportyn tutyný úshin óńir bıýdjetinen 361 mln teńge qarastyryldy. Qazirgi málimet boıynsha, atalǵan pasport aldymen 41 medıtsınalyq mekemede engiziledi.  Ár medıtsınalyq mekemeniń málimetter bazasynda elektrondy densaýlyq saqtaý pasporty, patsıenttiń jáne dárigerdiń jeke kabınetteri bolady. Dmed aqparattyq júıesi tutynýshylarǵa óz densaýlyǵynyń jaı-kúıi, densaýlyq saqtaý qyzmetteri týraly qajetti aqparattardy alýǵa múmkindik beredi», - dedi maman.

Ekaterına Slobodenıýk aıtqandaı, dárigerdiń jeke kabıneti oǵan naýqastyq fızıologııalyq jaǵdaıy týraly barlyq málimetterdi kórip, keri baılanys ornatýǵa jaǵdaı jasaıdy. Óz kezeginde turǵyndar jeke kabınetine kirip, medıtsınalyq uıymnyń kórsetken qyzmetine baǵa bere alady