Qostanaı oblysynda eki sút fermasy iske qosyldy

QOSTANAI. QazAqparat – QR Aýyl sharýashylyǵy mınıstrliginiń tapsyrmasy boıynsha Qostanaı oblysynda eki sút-taýarly ferma jumysyn bastady. Bul týraly oblys ákimdiginde ótken apparat jıynynda Aýyl sharýashylyǵy jáne jer qatynastary basqarmasynyń basshysy Tımýr Bısımbaev aıtty, dep habarlaıdy QazAqparat tilshisi.

Qostanaı oblysynda 33 sharýashylyq sút óndirisimen aınalysady. Onyń ishinde 10 iri sút-taýar fermasy tirkelgen. Endi bulardyń sany taǵy ekeýge kóbeıip otyr.

«Aýyl sharýashylyǵy mınıstrliginiń óńirlerge bergen tapsyrmasyn oryndaý maqsatynda Fedorov (100 basqa arnalǵan «Búrkit» JShS) jáne Jitiqara (80 basqa arnalǵan «Shadenov» ShQ) aýdandarynda 2 sút-taýarly fermasy jumysyn bastady. Buǵan qosa Qostanaı aýdanynda sút-taýar fermasynyń jumys aýqymy keńeıtildi. Osylaısha mınıstrliktiń tapsyrmasyn tolyqtaı oryndaı aldyq. Sút-taýar baǵytyndaǵy sharýashylyqtardyń qarjylyq jaǵdaıy turaqty», - deıdi basqarma basshysy.

Óńirde sút óndiretin seriktestikterdi qoldaýǵa basymdyq berilgen. Máselen, osy jyly bir ǵana «Mılh» sút zaýytyna 728 mln teńge sýbsıdııa bólindi.

Kásiporynda 130 adam turaqty jumys isteıdi. Jylyna 7,4 myń tonna sút ónimin naryqqa shyǵarady.

Tımýr Bısımbaev aıtqandaı, Aýyl sharýashylyǵyn qarjylaı qoldaý qory jáne Agrarlyq nesıe korporatsııasy jyl saıyn «Sybaǵa» jáne «Eńbek» baǵdarlamalary boıynsha jeńildikpen kredıt beredi usynady.

Qostanaılyq kásipkerler pandemııaǵa qaramastan nesıe alyp, sharýasyn dóńgelentip otyr.