Qostanaı oblysynda dándi daqyldardy jınaý aıaqtaldy

QOSTANAI. QazAqparat – Qostanaı oblysynyń dıqandary astyq daqyldaryn tolyqtaı jınady, dep habarlaıdy QazAqparat oblys ákiminiń baspasóz qyzmetine silteme jasap.

Bıyl óńirde jaýyn-shashyn uzaq ýaqyt bolmaýy jáne jazdaǵy aptap ystyq dándi daqyldardyń ósimi men jınaý kampanııasyn kesheýildetti. Degenmen, aýyl sharýashylyǵyndaǵy tsıfrlandyrý jáne agrotehnologııalardyń qoldanylýy arqyly jaǵdaı jaqsardy. Atap aıtqanda, ylǵaldy únemdeý ádisin engizýdiń arqasynda astyq kólemin jınaý byltyrǵy deńgeıinen asty. Oblystyń aýyl sharýashylyǵy qurylymdary 4,1 mln tonna kóleminde dándi daqyldardy jınady. Ónimdilik orta eseppen 10,2 ts/ga qurady, bul ótken jyldyń deńgeıinen joǵary.

«Jalpy jıyn-terim ótken jylǵy deńgeıden 1 mln tonnaǵa artyq. Jelilik astyq qabyldaý kásiporyndaryna 871 myń tonna dándi daqyl kelip tústi. Túsken bıdaıdyń 82%-y 3-sanatqa jatady, al 60%-dan astamynda 28 jáne odan joǵary paıyz glıýten bar. Oblysta óndiristi tsıfrlandyrý, tehnologııalyq protsesterdi avtomattandyrý esebinen jumys istep turǵan qaıta óńdeý kásiporyndary jańǵyrtylyp, jańa zamanaýı iri qaıta óńdeý keshenderi engizilýde. Osyǵan baılanysty, 4,1 mln tonnadan astam ónimniń 60%-dan astamy qaıta óńdeletin bolady, 1,2 mln tonna undy eksporttaý josparlanýda», delingen baspasóz habarlamada.

Qazirgi ýaqytta óńirdegi «Azyq-túlik korporatsııasy» UK» AQ astyq tapsyrý boıynsha belsendi jumys júrgizýde. Kelesi jylǵa 530 myń tonna tuqym saqtalsa, 1 mln gektardan astam alqap rezervke alyndy.