Qostanaı oblysynda tsement zaýyty iske qosyldy

QOSTANAI. QazAqparat - Tuńǵysh Prezıdent kúnine oraı Rýdnyı qalasynda sapasy joǵary tsement shyǵaratyn zaýyt iske qosyldy. Zaýyt Qazaqstannyń jáne Reseıdiń ońtústik óńirleriniń qurylys salalarynyń suranysyn qamtamasyz etedi, dep habarlaıdy QazAqparat tilshisi.

Saltanatty sharaǵa oblys ákimi Arhımed Muhambetov qatysty. Belgili bolǵandaı, jobany iske asyrýǵa 100 mıllıon dollar nemese shamamen 18 mlrd teńge ınvestıtsııa quıylǵan.

«Memleket qoldaý kórsetti. Atap aıtqanda, «DKB-2020» boıynsha bank aldyndaǵy -1 mlrd 350 mıllıon teńge protsenttik mólsherlemeniń sýbsıdııasy berildi. 750 mıllıon teńge ınjenerlik kommýnıkatsııalarǵa bólindi, 730 mıllıon teńge kepilge berildi, taǵy 600 mıllıon teńge temirjoldarǵa bólindi. Bastysy, tsementtiń sapasy jaqsy bolsyn», - dedi óńir basshysy.

Zaýyttyń jumys úderisi men jospary týraly kásiporynnyń dırektory Artem Maklasov aıtyp berdi. Onyń sózine qaraǵanda, búgin aınalma peshtiń oty jaǵylǵan.

«Biz ony klınker óndirisi úshin daıyndaımyz. Alǵashqy ónimdi bes kúnnen soń alýdy josparlap otyrmyz. Tsementke alǵashqy klıent belgili, ol - Reseıdiń Ýfa qalasynan. Olar 200-300 myń tonna, ıaǵnı zaýyttyń jobalyq qýatynyń jartysyn alýǵa ázir. Jergilikti tutynýshylarmen de kezdestik. Oblysqa 200 myń tonnadaı tsement qajet», deıdi A. Maklasov.

Jyl sońyna deıin zaýyt shamamen 17200 tonna tsement óndirmek.

«Qazir zaýytta 190 adam jumys istep jatyr. Bıýdjet 200-ge deıin jumysshyǵa jalaqy tóleýge shaqtalǵan. Degenmen zaýyt qarqyn alǵanda jumysshylar sany 304-ke jetedi», - deıdi ol.

Eske sala keteıik, tsement zaýytynyń qurylysy 2016 jyldan beri keıinge shegerilip keldi. Ony iske qosý 2018 jylǵy maýsymǵa josparlanǵan bolatyn.