Qostanaı oblysynda aımaqtyq ýnıversıtet quryldy

QOSTANAI. QazAqparat – Bıylǵy oqý jylynda Ahmet Baıtursynov atyndaǵy Qostanaı memlekettik ýnıversıteti men Sultanǵazın ýnıversıteti birigip, aımaqtyq oqý ornyna aınalady, dep habarlaıdy QazAqparat tilshisi.

Oqý oryndarynyń birigýi QR bilim jáne ǵylymdy damytýdyń 2020-2025 jyldarǵa arnalǵan memlekettik baǵdarlamasy sheńberinde iske asyp otyr. A.Baıtursynov atyndaǵy QMÝ rektory Alma Doşanovanyń aıtýynsha, eki ýnıversıtetti biriktirý týraly Qazaqstan Respýblıkasynyń Bilim jáne ǵylym mınıstrligi sheshim qabyldady. Sol sheshimniń negizinde «Jol kartasy» jasaldy.

«Oqý orny A.Baıtursynov atyndaǵy Qostanaı aımaqtyq ýnıversıteti dep atalady. Munda barlyǵy 8000 stýdent bilim alady. Búginde oqý oryndarynyń múlkin baǵalaý júrgizilýde. Bul jumysty QR Qarjy mınıstrliginiń Memlekettik múlik jáne jekeshelendirý komıteti atqarýda. Biz oqý ornynyń aldaǵy bes jyldaǵy damytý baǵdarlamasyn qabyldadyq. Negizgi maqsatymyz – bilim berý jaǵynan ǵana emes, sonymen qatar ǵylymı zertteýler deńgeıinde respýblıkadaǵy eń úzdik ýnıversıtetterdiń qatarynda bolý. Buǵan barlyq múmkindik bar. Aldaǵy ýaqytta aımaqtyq ýnıversıtet oqytýshylarynyń jalaqysy ósedi», - dedi Alma Doşanova.

Ýnıversıtette barlyq mamandyq boıynsha biliktilik emtıhanyn tapsyratyn jumys berýshiler keńesi jumys isteıdi. Sonymen qatar, memlekettik-jekemenshik seriktestik aıasynda 500 oryndyq jańa jataqhana salynady.