Qostanaı oblysynda aýyl sharýashylyǵyn sýbsıdııalaý máselesi talqylandy

QOSTANAI. QazAqparat – Aýyl sharýashylyǵyn sýbsıdııamen qamtý, olardyń qoljetimdiligi men tıimdiligi Qostanaı qalasynda ótken dóńgelek ústel otyrysynda qaraldy, dep habarlaıdy QazAqparat.

Qazaqstan kommýnıstik halyq partııasynyń Qostanaı oblystyq komıteti uıymdastyrǵan jıynǵa ákimdik ókilderi, partııa músheleri men qoǵam belsendileri qatysty.

Basty taqyryp – aýyl sharýashylyǵyn damytý úshin bólinetin sýbsıdııaǵa qol jetkizý jáne olardyń tıimdi bólinýi.

«Sýbsıdııalar eń aldymen toqyraý aldynda turǵan sharýashylyqtardy qoldaýǵa arnalǵan qarjy júıesi sanalady. Ol sharýashylyqtyń bankrotqa ushyrap ketpeýi úshin bólinedi. Biz sýbsıdııalardyń salyq tóleýshilerdiń qarajaty ekenin eske salamyz, demek biz onyń tıimdiligi qandaı ekenin bilýimiz kerek. AÓK-ke 260 mlrd teńge qarastyryldy. Alaıda bul qarjyny naqty kimniń, qalaı alǵany belgisiz», - deıdi QKHP oblystyq komıtetiniń ekinshi hatshysy Vladımır Skýrıdın.

Rasymen de, elimizdiń agroónerkásiptik kesheni arqyly kásipkerlikti qoldaý boıynsha tıisti jaǵdaılar jasalýda. Basym baǵyttardy sýbsıdııalaý, jeńildikti nesıeler jáne lızıngpen qamtamasyz etý, AÓK sýbektileri úshin salyq salýdyń arnaıy rejımderin engizý jobalary bekitilgen.

Deı turǵanmen, AÓK damytý úshin beriletin sýbsıdııalar aýqymdy sharýashylyqtarǵa berilip, shaǵyn bıznes sýbektilerine jetpeı qalyp jatady. Máselen, óńirdegi «Olja Agro» JShS gerbıtsıdter boıynsha 2020 jyly 150 mln teńge sýbsıdııa alǵan.

Qostanaı aýdanynyń aýyl sharýashylyǵy bóliminiń basshysy Marat Sartov qatysýshylarǵa agroónerkásiptik keshen sýbektilerin memlekettik qoldaý iri sharýashylyqtardy ǵana emes, shaǵyn jáne orta bıznes nysandaryn qoldaýǵa baǵyttalatynyn aıtty.

– Bul rette bári ashyq ótedi. Ótinim «Qoldaý» júıesi arqyly beriledi. Sýbsıdııa alýshylardy aqparattyq júıe avtomatty túrde anyqtaıdy. Sondyqtan jeńildikter barlyǵyna birdeı qarastyrylǵan. Saıt arqyly «barmaq basty, kóz qystynyń» bolýy múmkin emes, - dep túsindirdi oblystyq aýyl sharýashylyǵy basqarmasynyń ókili Murat Doşanov.

Dóńgelek ústel qorytyndysy boıynsha kommýnıster AÓK-ti memlekettik qoldaý tetikterin qaıta qaraý úshin depýtattyq fraktsııaǵa júginýge nıetti, bul rette basty krıterıı - sýbsıdııanyń tıimdiligi bolmaq.

Aıta keteıik, jergilikti deńgeıde aýyl sharýashylyǵy ónimderin óńdeý boıynsha kásiporyndarǵa 25%-yna deıin ınvestıtsııalyq sýbsıdııa usynylady.