Qostanaı oblysynda aýdan ákiminiń orynbasary jol apatynan kóz jumdy

QOSTANAI.QazAqparat – Qarasý aýdany ákiminiń orynbasary Talǵat Jarmaǵambetov jol apatyna túsip, kóz jumdy, dep habarlaıdy QazAqparat oblystyq polıtsııa departamentiniń baspasóz qyzmetine silteme jasap.

Oqıǵa 8 jeltoqsan kúni «Qarasý – Úlken Chýrakovka» tasjolynda bolǵan.

«28 jastaǵy er adam basqarǵan «Ravon» avtokóligi rólge ıe bola almaı, jol jıeginen shyǵyp ketti. Saldarynan 42 jastaǵy jolaýshy Qarasý aýdandyq aýrýhanasynda qaza boldy. Bul derek QR QK 345-baby, 3-bóligi boıynsha tirkeldi. Qazirgi ýaqytta sotqa deıingi tergeý jumystary júrip jatyr. Medıtsınalyq kýálandyrýdyń qorytyndysyna sáıkes, «Ravon» kóliginiń júrgizýshisi ishimdik ishpegen», - deıdi polıtsııanyń baspasóz qyzmetindegiler.

Qarasý aýdany ákimdiginde málim etkendeı, jol-kólik oqıǵasynan kóz jumǵan Talǵat Jarmaǵambetov aýdany ákiminiń ekonomıkalyq máseleler jónindegi orynbasary qyzmetinde bolǵan. Bul laýazymdy 2017 jylǵy 18 qazannan bastap atqardy.