Qostanaı oblysynda asa iri kólemdi geroın partııasy tárkilendi

NUR-SULTAN. QazAqparat – Qostanaı oblysynda geroınniń qomaqty partııasy tárkilendi. Bul týraly Іshki ister mınıstrliginiń resmı ókili Nurdildá Oraz onlaın brıfıngide málim etti, dep habarlaıdy QazAqparat tilshisi.

«Esirtki qylmysyna qarsy is-qımyl bólimshesiniń qyzmetkerleri prokýratýra organdarymen birlesip kúdikke ilingen jeke kásipkerdi ustady. Odan 0,5 keliden astam geroın tárkilendi. Esirtki úıdegi isten shyqqan tońazytqyshta saqtalyp kelgen. Budan arǵy tergeý áreketteri barysynda kúdiktiniń buryn esirtki qylmysy úshin sottalǵan seriktesiniń páterinde birrettik doza retinde ólshenip, 36 túıinshekke oralǵan 22 gramm geroın jáne tárkilendi», - dedi ІІM resmı ókili.

Qazir kúdiktiler ýaqytsha ustaý ızolıatorynda. Kinálary dáleldense, dúnıe-múlikteri tárkilenip, ózderi 15 jylǵa deıin bas bostandyǵynan aıyrylady.

Nurdildá Orazdyń aıtýynsha, atalmysh qylmystyń joly kesilmegen jaǵdaıda geroınniń 3 myńǵa jýyq dozasy «naryqqa» shyǵar edi.

«Al Qaraǵandyda polıtsııa qyzmetkerleri Jambyl oblysy Shý aýdanynyń turǵynynan gashıshtiń iri partııasyn tárkiledi. Esirtki qylmysyna qarsy is-qımyl departamentiniń habarlaýynsha, kúdikti qylmysqa oqtalǵan sátten bastap baqylaýda bolǵan.

Qaraǵandyǵa poıyz bıletin satyp alǵany týraly aqparat túsken boıda ony ustaý sharalary qabyldandy. Osylaısha kúdikti tańǵy saǵat 5-te Qaraǵandyǵa túsken sátte ustaldy. Sómkesinen 40 keliden astam gashısh tabyldy», - dedi vedomstvonyń resmı ókili. Aıtýynsha, kúdiktiniń kinási dáleldense, múlki tárkilenip, 10 jyldan 15 jylǵa deıin bas bostandyǵynan aıyrylýy múmkin.