Qostanaı oblysynda alıment boıynsha boryshkerlerden 13 mln-ǵa jýyq teńge óndirip alyndy

QOSTANAI. QazAqparat – Qostanaı oblysynyń jeke sot oryndaýshylary (JSO) bir aı ishinde 13 mln teńgege jýyq qarajat óndirip aldy, dep habarlaıdy QazAqparat Qostanaı oblysy JSO óńirlik palatasynyń baspasóz qyzmetine silteme jasap.

Qostanaı oblysy jeke sot oryndaýshylarynyń óńirlik palatasy alıment qaryzdaryn óndirip alý boıynsha bir aıdyń qorytyndysyn shyǵardy.

Bıylǵy sáýir aıynda Qostanaı oblysynyń sot oryndaýshylary boryshkerlerden 12 849 126 teńge, al birinshi toqsanda 43 mln teńge óndirip aldy.

«Búgingi tańda atqarýshylyq is júrgizý organdarynyń avtomattandyrylǵan aqparattyq júıesiniń (AІJO AAJ) derekterine sáıkes, jyl basynda óńirdiń sot oryndaýshylarynyń oryndaýynda alıment óndirý týraly 16 myńǵa jýyq atqarýshylyq is júrgizý bolǵan. Olardyń ishinde bereshegi óte kóp problemalyq máseleler de barshylyq. Biz bul baǵytta jumysty belsendi túrde júrgizip jatyrmyz. Óıtkeni bizdiń aımaq «antı-reıtıngte» tur. Biz jumysqa ornalastyrýǵa, boryshkerlerdi izdestirýge, olardy kúshtep ákelýge, izdeý jarııalanǵan kólik quraldaryn ustaýǵa, múlikti, jasyryn kiristerdi anyqtaýǵa, sondaı-aq jalaqysy zańnamada belgilengen mólsherden tómen kásiporyndarǵa qatysty sharalar qabyldaý boıynsha jumysty bastadyq. Eń bastysy – boryshkerlerdi ákimshilik jáne qylmystyq jaýapkershilikke tartý», - dedi Qostanaı oblysy JSO óńirlik palatasynyń basshysy Nesibeli Básenova.