Qostanaı oblysynda áleýmettik mańyzy bar azyq-túlik baǵasy tómendegen
Oblysta negizgi azyq-túlik taýarlary baǵasynyń negizsiz ósýine jol bermeý maqsatynda keshendi jumystar júrgizilýde. Óńirde arnaıy qurylǵan turaqtandyrý qory turǵyndardy birneshe aı boıy azyq-túlikpen qamtamasyz etýge qaýqarly.
«Oblystaǵy azyq-túlik qory 64,2 tonnaǵa jetti. Un, makaron jáne nan ónimderin óndirý kólemi oblys halqynyń jyldyq qajettiliginen 10 ese artyq, al sıyr eti – 1,3, sút – 1,7, ósimdik maıy 1,4, jumyrtqa – 1,5, kartop 2 ese kóp. Budan bólek, óńirlik turaqtandyrý qorynda 6,6 myń tonna azyq-túlik qory bar. 19 áleýmettik mańyzy bar taǵamnyń ishinde tek eki taýar - qant pen taýyq etin satyp alamyz, qalǵan taýarlar jergilikti óndiris tiziminen ımporttalady. Turaqtandyrý qoryndaǵy azyq-túlik únemi tolyqtyrylyp otyrady», - dedi basqarma basshysy.
Áleýmettik mańyzy bar azyq-túlik taýarlarynyń ishinde kúrish, taýyq eti, aıran, súzbe, jumyrtqa, kúnbaǵys maıy, qant baǵasynyń tómendeýi baıqalady. Al jyl basynan beri pııaz ben kartop, sábiz ben arpa ónimderi 5%-ǵa qymbattaǵan.
«Qazir taýyq eti 16,4%-ǵa qymbattap ketken. Baǵanyń ósýi rýbl jáne dollar kýrsynyń joǵarylaýyna baılanysty. Sondaı-aq jemniń, vetpreparattardyń jáne óndiristiń ózge de shyǵyndarynyń quny áser etedi. Oblysqa AQSh pen Reseıden 10,3 myń tonna qus eti ákelingen. Baǵa ósýiniń taǵy bir sebebi, aýdandar men qalalardyń ákimdikteri jetkilikti baqylaý jasamaı otyr. Taýar qunyn ustap turý boıynsha tıisti túrde jumys júrgizilmeıdi. Mysaly, Áýlıekól aýdanynda 1 sortty unnyń baǵasy 118 teńgege jetken. Bul shekti, belgilengen baǵadan asyp otyr. Meńdiqara, Qostanaı aýdandarynda dál osy un kelisine 100 teńgeden satylady», - dedi J.Táýkenov.
Oblys ákimi aýdandar men qalalardyń ákimderine azyq-túlik baǵasyn saqtaý jáne negizsiz qymbattatpaý boıynsha naqty sharalar qabyldaýdy tapsyrdy. Sondaı-aq baǵany turaqtandyrý týraly memorandýmdar jáne deldalsyz tikeleı ónim jetkizý týraly sharttar jasasý ákimderdiń quzyrynda.