Qostanaı oblysynda aldaǵy jyldary 9 mektep salynady
Vıtse-premer birinshi kezekte oblystyq kópsalaly aýrýhanany aralady. Medıtsına mekemesiniń jaı-kúıin kózimen kórip shyqqan soń, 200 oryndyq perınataldyq ortalyq salý máselesin talqylady. Ol Prezıdenttiń tapsyrmasy boıynsha óńirlerde salynatyn 12 nysannyń biri bolmaq. Keleshekte jańa kópsalaly aýrýhana salý máselesi Densaýlyq saqtaý mınıstrliginde qaralmaq.
«Úkimet elimizdiń medıına mekemelerin nyǵaıtý, jańǵyrtý, zamanaýı jabdyqtarmen jaraqtandyrý baǵytynda jumys istep jatyr. «Aýyldaǵy densaýlyq saqtaýdy jańǵyrtý» memlekettik baǵdarlamasy aıasynda 2023-2024 jyldary shalǵaı aýyldarda dárigerlik ambýlatorııalar, feldsherlik-akýsherlik jáne medıtsınalyq pýnktter salý josparda», — dep atap ótti A. Kólginov.
Sondaı-aq vıtse-premer Qostanaı qalasyndaǵy «Bereke» shaǵyn aýdanynda salynyp jatqan 980 oqýshyǵa arnalǵan jańa mektepke de bardy. Onyń qurylysyn aıaqtaý úshin Qarabalyq aýdany Gýrıanovka aýylyndaǵy mektepter sııaqty qosymsha qarajat bólý qajet. Bul eki nysannyń qurylysyn merziminde aıaqtaý josparlanýda.
Aıta ketý kerek, «Jaıly mektep» ulttyq jobasy aıasynda Qostanaı oblysynda 2026 jylǵa deıin 15 myń oqýshyǵa arnalǵan eki aýysymda oqıtyn 9 mektep salý josparlanyp otyr.
Premer-mınıstrdiń orynbasary Qostanaı polıtehnıkalyq joǵary kolledjine de bas suqty. Munda mashına jasaý, energetıka, agrarlyq salalar úshin mamandar daıarlanady. Qazirgi tańda kolledjde 1200-ge jýyq stýdent oqıdy. Ákimdik jeke ınvestordy tarta otyryp, MJÁ qaǵıdatymen 500 oryndyq jataqhana salý máselesin qolǵa alǵan.
A.Kólginov «Jas maman» respýblıkalyq jobasy aıasynda jańartylǵan zerthanalar men sheberhanalardy da aralap shyqty.
Aıta ketý kerek, jobanyń arqasynda elimizdiń 180 kolledji zamanaýı oqý jabdyqtarymen qamtamasyz etilip, olarǵa jańa bilim berý baǵdarlamalary engizilgen. Eki myń pedagog biliktilikti arttyrý kýrstarynan ótken. Jalpy, «Jas maman» baǵdarlamasy aıasynda jańǵyrtylǵan oqý oryndarynda 30 myńnan astam stýdent oqıdy.
Aımaqtaǵy sapar barysynda Premer-mınıstrdiń orynbasary Qostanaı aýdany Jýkov aýylynyń turǵyndarymen kezdesti. Onda 2,5% jeńildikpen nesıe beretin «Aýyl Amanaty» jobasyn iske asyrýdy talqylady.
«Aýyl Amanaty» – aýyl turǵyndaryn qoldaýǵa, kásibin ashýǵa múmkindik beretin baǵdarlama», — dep atap ótti A. Kólginov.
Jańa turǵyn úı jáne demalys nysandary salynyp jatqan aýyldyń serpindi damýyn nazarǵa ala otyryp, oblys ákimdigimen birlesip, «Aýyl – El besigi» baǵdarlamasy aıasynda Jýkovtyń ortalyq kóshesin asfalttaý, sý qubyryn júrgizý jáne keleshekte 100 oqýshyǵa arnalǵan orta mektep salý týraly sheshim qabyldandy.
Jalpy respýblıkada 2023 jyly memlekettik baǵdarlama arqyly 143 mlrd teńgege 1530 jobany iske asyrý josparlanǵan: onyń 119-y ınjenerlik jelilerdi jańǵyrtýǵa, 275-i áleýmettik ınfraqurylymǵa (mektepter, balabaqshalar, feldsherlik pýnktter, emhanalar) qatysty, 1136-sy kentishilik joldardy salý men jóndeýge baǵyttalmaq.
Sondaı-aq jumys sapary barysynda vıtse-premer mektep jasyndaǵy balalarǵa arnalǵan Smart-ortalyqtyń qurylysymen tanysty. Mundaǵy shyǵarmashylyq úıirmeler men sport sektsııalary oqýshylarǵa jan-jaqty damýǵa, ózderine unaıtyn hobbı tabýǵa jáne bolashaqta mamandyq tańdaýǵa kómektespek.