Qostanaı oblysynda 9700 turaqty jumys orny ashylady

QOSTANAI.QazAqparat – Qostanaı oblysynyń ákimi Arhımed Muhambetov qala men aýdan ákimderimen selektorlyq keńes ótkizip, «Eńbek» baǵdarlamasynyń oryndalý barysyn talqylady, dep habarlaıdy QazAqparat tilshisi ákimdiktiń baspasóz qyzmetine silteme jasap.

Byltyr óńirdegi shaǵyn jáne orta bıznestiń damýyna koronavırýs pandemııasy aıtarlyqtaı áser etti. Soǵan qaramastan memlekettik baǵdarlamalardy iske asyrý arqyly kásipkerlerdiń tabysy saqtalyp, jańa jumys oryndary ashyldy.

Úkimet basshysynyń tapsyrmasyna sáıkes, jumyssyzdyqpen kúreske erekshe mán berildi. Turaqty tabysynan aıyrylǵandarǵa ýaqytsha jumys tabyldy. «Eńbek» baǵdarlamasynyń negizgi kórsetkishteri oryndaldy. Jumyspen qamtý sharalarymen 31 767 adam qamtyldy.

«Bul jumys bıyl da jalǵasyn tabady. Baǵdarlamany iske asyrýǵa 9 mlrd teńgeden astam qarajat kózdelgen. Qarjynyń eselenýi tıisinshe jumys ornynyń kóbeıýine yqpal etedi. Byltyrǵy 1 jeltoqsandaǵy málimet boıynsha oblysta 9749 turaqty jumys orny qurylǵan. 2021 jyly 17 300 jumys ornyn ashý josparlanýda, onyń ishinde 9 700 turaqty jumys orny bolady», - dedi aımaq basshysy.