Qostanaı oblysynda 90 myń adam vaktsına qabyldaıdy

QOSTANAI.QazAqparat – Qostanaı oblysynda 365 dárigerge reseılik «Spýtnık V» vaktsınasy egildi. Bul týraly óńirlik kommýnıkatsııa ortalyǵynda ótken baspasóz jıynynda oblystyń bas sanıtarııa dárigeri Ermuhanbet Dáýletbaev málim etti, dep habarlaıdy QazAqparat tilshisi.

Birinshi kezekte vaktsına ınfektsııalyq statsıonarlardyń, jedel medıtsınalyq kómektiń, reanımatsııa jáne qarqyndy terapııa bólimsheleriniń, sanepıdqyzmettiń, medıtsınalyq-sanıtarlyq kómek uıymdarynyń qyzmetkerlerine egiledi. Sodan keıin muǵalimder, ýchaskelik polıtsııa qyzmetkerleri, stýdentterge salynady.

«Qazir 18 jasqa tolmaǵan jáne 65 jastan asqan turǵyndarǵa vaktsına salynbaıdy. Munyń «Spýtnık V» vaktsınasynyń sapasyna esh qatysy joq. Statıstıkalyq málimetterdiń azdyǵynan osyndaı uıǵarymǵa kelip otyrmyz. Statıstıkany taldaýǵa birneshe aı ýaqyt ketedi, tek sodan keıin ǵana balalar men egde tartqan azamattarǵa vaktsına egý týraly sheshim qabyldanady. Reseıden 1200 vaktsına ákelindi, olar taýsylǵan soń «Qaraǵandy farmatsevtik kesheni» shyǵarǵan «Gam-KOVID-Vak» pen BǴM Bıologııalyq qaýipsizdik máseleleri ǵylymı ınstıtýtynyń «QazCovid» vaktsınasy paıdalanylady», - deıdi bas sanıtar.

Sanepıdqyzmettiń málimetine súıensek, jyl sońyna deıin óńirdiń 90 myńnan astam turǵyny ekpe alýy tıis.