Qostanaı oblysynda 60 adam «Elbasy medalimen» marapattalady
2019 jyly Qazaqstannyń Tuńǵysh Prezıdenti - Elbasy belsendi jáne talantty jastardy qoldaý boıynsha «El Úmiti» jalpyulttyq bastamasyn usynǵan bolatyn. Nursultan Nazarbaev Qory uıymdastyratyn jobalardyń biri – «Elbasy medali» baǵdarlamasy. 14-29 jas aralyǵyndaǵy jastarǵa arnalǵan joba 2020 jyldyń shildesinde bastaldy. Ol 7 baǵyt boıynsha damý baǵdarlamasyn kózdeıdi: sport, talanttar men daǵdylar, kitap oqý, ulttyq mura, volonter, ekspedıtsııalar men joryqtar, eńbek praktıkasy.
Qostanaı oblysynda «Elbasy medali» baǵdarlamasyna 503 adam qatysty. Solardyń biri –Qostanaı qalasyndaǵy Nazarbaev Zııatkerlik mektebiniń oqýshysy Sofııa Sınıtsına. Sofııa oblys ákimi Arhımed Begejanuly Muhambetovtiń qolynan óz marapatyn alyp otyr.
Sofııa Sınıtsına 6 jasynan bastap oblystyq shahmat týrnırlerine qatysyp keledi. Ádebıet pen ónerge degen qyzyǵýshylyǵy joǵary.
«Uly Abaıdyń mereıtoıyna arnalǵan respýblıkalyq mánerlep oqý konkýrsynda bas júldeni ıelendim. Sonymen qatar «Altyn medal-2018» halyqaralyq konkýrsynda 1 orynǵa ıe boldym. Birneshe ret matematıka jáne orys tili páninen qalalyq olımpıadalarda jeńiske jettim, zııatkerlik jarystarǵa qatysqandy unatamyn. Jas sýretshilerge arnalǵan konkýrstarda da marapattarym bar. Osy jetistikterime «Elbasy medali» qosyldy. Bul men úshin sheksiz baqyt. Elbasynyń ózi jastardyń ámbebap bolýy kerektigin aıtqan edi. Óıtkeni eldiń bolashaǵy sapaly bilim alǵan jas urpaqqa baılanysty», - deıdi «Elbasy medaliniń» ıegeri.
Jalpy Qostanaı oblysynda 60 qatysýshy «Elbasy medali» jobasynyń jeńimpazy atandy.