Qostanaı oblysynda 6,6 myń tonnadan astam azyq-túlik qory jasaldy

QOSTANAI.QazAqparat – Qostanaı oblysynyń Agroónerkásiptik keshenin damytý úshin óńirlik turaqtandyrý qory quryldy. Onyń jumysy týraly óńirlik kommýnıkatsııalar alańynda ótken brıfıngide «Tobyl» áleýmettik-kásipkerlik korporatsııasy basqarma tóraǵasynyń orynbasary Baıbosyn Mýrzın aıtyp berdi, dep habarlaıdy QazAqparat tilshisi.

2018-2021 jyldarǵa arnalǵan azyq-túlik taýarlarynyń óńirlik turaqtandyrý qoryn qalyptastyrý úshin Qostanaı oblysy ákimdiginiń aýyl sharýashylyǵy jáne jer qatynastary basqarmasy 1 mlrd teńgeden astam somaǵa «Tobyl» ÁKK qyzmetterin satyp aldy. Onyń ishinde 200 mln teńge kásipkerlik sýbektisine qaryz berýge baǵyttalǵan.

«Áleýmettik mańyzy bar azyq-túlik taýarlarynyń 14 túri irikteldi. Jalpy somasy 775,9 mln.teńgege 4,1 myń tonna ónim jáne 11,6 mln dana jumyrtqa satyldy. Aǵymdaǵy jyly turaqtandyrý qoryna 8,5 myń tonna ónim tústi. Oǵan 1 mlrd 239 mln teńge jumsaldy. Óńirlik turaqtandyrý qoryndaǵy ónim kólemi 6,6 myń tonnadan asady. Jyl sońyna deıin memlekettik satyp alýdyń arnaıy tártibi boıynsha 20 tonna qaraqumyq jarmasy, 50 tonna kúnbaǵys maıy, 60 tonna kúrish satyp alý josparlanyp otyr», - dedi Baıbosyn Mýrzın.

Qazirgi ýaqytta turaqtandyrý qoryna 181,1 tonna qant, 19,3 tonna kúrish, 1,05 tonna qaraqumyq, 5 myń tonna bıdaı uny, 270,5 tonna makaron ónimderi, 11 tonna ósimdik maıy jınaldy. Olar azyq-túlik taýarlary azaıǵan aýdan-qalalarǵa arnaıy tártip boıynsha úlestirilip otyrady.