Qostanaı oblysynda 470 jas kásipker jeke isin ashqan

QOSTANAI. QazAqparat – Qostanaı oblysynda úsh myńnan astam adam kásipkerlik negizderin oqytý krýsynan ótti. Bul týraly oblystyq aýyl sharýashylyǵy jáne jer qatynastary basqarmasynyń basshysy Jansultan Taýkenov aqparat berdi, dep habarlaıdy QazAqparat.

Basqarma basshysynyń aıtýynsha, atalmysh baǵdarlamanyń ekinshi baǵyty boıynsha kásipkerlerdiń nesıe alýyna barynsha qolaıly múmkindik jasalǵan. Máselen, mal sharýashylyǵyn damytý úshin 7 jyl merzimge 6,6 mln teńgege deıin nesıe beriledi. Jyldyq syıaqy mólsherlemesi de yńaıly – 6%-ten kóp emes. Shaǵyn nesıeler bıznestiń basym baǵyttarynyń 65 túri boıynsha beriledi. «Bastaý bıznes» jáne «Jas kásipker» bıznes baǵdarlamalary aıasynda birneshe adam kásip ıgergen.

«2019 jyly «Bastaý Bıznes» jobasy boıynsha 3140 adam oqydy. 470 jas qatysýshy jeke bıznesin ashsa, 863-i qarjylandyrýǵa ıe boldy. Onyń ishinde, 442 adam mal sharýashylyǵyn damytýǵa kiristi. Al «Jas kásipker» jobasy boıynsha 900 adam oqydy. 294-i óz isin ashqan. 354 qatysýshy qarjylandyrýǵa qol jetkizip, 63-i mal baǵý isin bastady. Shaǵyn nesıelerdi kepildendirýge jergilikti bıýdjetten 17,4 mln teńge bólindi», – dedi J.Taýkenov.

Jalpy, atalmysh baǵdarlamalar aıasynda 2019 jyly 892 jańa jumys orny, 505 startap joba paıda bolǵan. 505 startaptyń da 359 jobasy mal sharýashylyǵyn damytýǵa baǵyttalǵan.

«Shaǵyn nesıeler esebinen 1898 iri-qara mal, 1869 bas jylqy jáne 1628 qoı-eshki satyp alyndy. Shaǵyn jáne orta bıznesti nesıemen qamtýǵa 3,6 mlrd teńge baǵyttaldy. Ony «Aýyl sharýashylyǵyn qoldaý qory» jáne «Agrarlyq nesıelik korporatsııa» aktsıonerlik qoǵamdary bóldi. Búginde 819 ótinish maquldandy. Onyń 783-i aýyldyq jerlerdiń jas kásipkerleri», - dedi basqarma basshysy.

Kásip baǵdarlamalaryna Amangeldi, Jangeldın, Meńdiqara, Qostanaı jáne Altynsarın aýdandary belsendi qatysqan.