Qostanaı oblysynda 45 aýyl derbes bıýdjetke kóshti
Jergilikti ózin-ózi basqarýdyń qalyptasýy - el ekonomıkasynyń odan ári damýyndaǵy basym baǵyttardyń biri. Búgin osy másele oblys ákimdiginde ótken keńeıtilgen alqa májilisinde talqylandy. Oblys ákiminiń orynbasary Erlan Spanov aıtqandaı, qazirgi ýaqytta aýyldyq okrýgter men aýdandar arasynda qyzmet aýqymyn ajyratý, bıýdjetti jáne kommýnaldyq menshikti qalyptastyrý týraly máseleler pysyqtaldy.
«Aǵymdaǵy jyldyń 1 qańtarynan bastap halyq sany 2 myńnan asatyn 45 ákimshilik-aýmaqtyq birlik derbes bıýdjetke kóshirildi. Atalǵan aýyldyq okrýgterdiń óz qarjysynyń bolýy osy saladaǵy jumystarymyzdyń birinshi satysy ǵana ekenin eskertken jón. 2020 jyldan bastap, oblystyń taǵy 200 eldi mekeni jergilikti ózin-ózi basqarýdy damytýdyń jańa kezeńine kóshetin bolady», - dedi oblys ákiminiń orynbasary.
Aıta keteıik, jeke bıýdjetke aýystyrylǵan 45 aýylda 368 memlekettik qyzmetshi bar. Sonymen qatar osy aýyldarda 9 bos oryn toltyrylmaǵan. Atap aıtqanda, Qostanaı aýdanynyń Ozernoe aýyly ákimsiz otyr. Sondaı-aq, Uzynkól aýylynda esepshi jetispese, Fedorov aýdanynyń Peshkov aýyldyq okrýginde zańger joq. Erlan Spanov jergilikti ózin-ózi basqarýǵa kóshý boıynsha bastapqy kezeńniń aıaqtalýyna qaramastan, birqatar kemshilikter bar ekenin atap ótti.
«Derbes bıýdjetterdi kedergisiz engizýge yqpal etetin sharalar áli de jalǵasady. Birinshi kezekte, aýyldyq okrýg apparattarynyń kadrlyq qamtamasyz etilýi, qyzmetkerlerdi oqytý jáne qaıta daıarlaý máseleleri kún tártibine qoıyldy. Munymen qosa aýyldyq okrýgterdiń ákimderin memlekettik satyp alý boıynsha ótkiziletin jumystardy basty nazarǵa alýǵa shaqyramyn. Búgingi deıin quny 98,3 mln teńge bolatyn 15 satyp alý konkýrsy ótkizilgen joq. Máselen, Arqalyq qalasyndaǵy Rodına, Sarykól aýdanyndaǵy Sarykól, Qarasý aýdanyndaǵy Oktıabr, Jankeldın aýdanyndaǵy Torǵaı aýyldary áli birde-bir konkýrs jarııalamady», - dedi E.Spanov óz baıandamasynda.
Óz kezeginde oblys ákimi Arhımed Muhambetov qalalar men aýdandardyń ákimdikterine derbes bıýdjetke kóshken aýyldardaǵy qarjy júıelerine jáne kommýnaldyq menshikti basqarý jumystaryna qoldaý kórsetilýi kerektigin aıtty.
Foto: kostanaytany.kz