Qostanaı oblysynda 4 myńdaı shaǵyn kásipkerlik jumysyn toqtatty

QOSTANAI. QazAqparat – Pandemııa saldarynan keıbir kásipkerlik sýbektilerine belgili bir shekteý salynyp, arasynda jumysyn ýaqytsha toqtatqandary bar. Bul týraly Óńirlik kommýnıkatsııalar alańynda ótken brıfıngte Qostanaı oblysy ákimdiginiń kásipkerlik jáne ındýstrııalyq-ınnovatsııalyq damý basqarmasynyń basshysy Oljas Saparbekov aıtyp berdi, dep habarlaıdy QazAqparat tilshisi.

Álemdi jaılaǵan indet otandyq kásipkerlik salasyn da aınalyp ótken joq, kóptegen shaǵyn jáne orta bıznes sýbektileri jumysyn toqtatýǵa májbúr bolyp otyr. Qostanaı oblysynda kásipkerlik jáne bıznesti qoldaý salasynda KVI taralýyna jol bermeý boıynsha keshendi sharalar qolǵa alynǵanymen, shyǵynǵa ushyraǵan kásip nysandary jabylyp qaldy.

«Karantındik sharalardyń engizilýine baılanysty bólshek saýda salasyndaǵy kásiporyndardyń 48,1%-i qıyn jaǵdaıǵa tap boldy. Jyljymaıtyn múlikpen aınalysatyn uıymdar men jolaýshylar kóligi, qoǵamdyq tamaqtaný, onyń ishinde meıramhanalar bıznesi biraz shyǵynǵa batty. Statıstıka organdarynyń derekteri boıynsha 24 myńnan astam ShOB sýbektisine karantındik sharalar áser etti. Shekteýler jalpy kásipkerlik salasyna teris áser etti. 2020 jylǵy 1 qazandaǵy jaǵdaı boıynsha jumys istep turǵan ShOB sýbektileriniń sany 6,7%-ǵa tómendedi, ıaǵnı oblysta 51365 bıznes nysany jumys isteıdi. Byltyr tirkelgen ShOB sýbektileriniń sany 55081-ge jetken bolatyn», - deıdi Oljas Saparbekov.

Basqarma basshysynyń aıtýynsha, jumys istep turǵan ShOB sýbektileriniń kórsetkishterin arttyrý boıynsha belsendi jumys júrgizilýde. Oblysta engizilgen shekteýlerge qaramastan, kásipkerlik salasyn nesıeleý kemigen joq. Mysaly, «Bıznestiń jol kartasy-2025» baǵdarlamasy boıynsha osy jyldyń 10 aıynda 32 mlrd teńgege 398 bıznes-jobaǵa qoldaý kórsetilgen. Agroónerkásiptik keshen salasyndaǵy ShOB-ty qoldaýǵa 38,4 mlrd teńgege sýbsıdııalar men bıýdjettik kredıtter baǵyttaldy. Nátıjesinde 18600 kásip ıesiniń jumysy ilgerilemek.