Qostanaı oblysynda 27,9 myń ga jaıylym memleket menshigine qaıtaryldy

NUR-SULTAN. QazAqparat - «AMANAT» partııasy janyndaǵy «Jer amanaty» komıssııasy Qostanaı oblysynda boldy. Aımaqtaǵy kóshpeli keńes qorytyndysy boıynsha 27,9 myń ga jaıylym jer memleket menshigine qaıtaryldy, dep habarlaıdy QazAqparat partııanyń baspasóz qyzmetine silteme jasap.

Atap aıtqanda, Fedorov aýdanynda – 7,1 myń ga, Naýyrzym aýdanynda – 20,8 myń ga qaıtarylyp, Meńdiqara aýdanynda iri sharýa qojalyqtarynyń birimen 3,4 myń ga jerdi kópshiliktiń qoldanysy úshin óteýsiz berý týraly memorandým jasalǵan.

«Bizdiń komıssııanyń basty maqsaty – paıdalanylmaı jatqan, onyń ishinde zańsyz jeke menshikke ótip ketken jaıylymdardy qaıtarý jáne olardy aýyl turǵyndary úshin qoljetimdi etý. Jyl basynan beri Qostanaı oblysynda 60 myń ga paıdalanylmaı jatqan jer qaıtaryldy. Sonymen qatar, jalpy aýdany 45,4 myń ga bolatyn 24 jer ýchaskesin qaıtarý máselesi búginde sot óndirisinde. Jalpy, «Jer amanaty» komıssııasynyń jumysy 267 myń ga jerdi memleket menshikke qaıtarýǵa kómektesti», - deıdi partııa hatshysy Dáýlet Káribek.

Keıingi birneshe aı ishinde Komıssııa músheleri Jetisý, Qaraǵandy, Jambyl, Túrkistan jáne Aqtóbe oblystarynda boldy. Jer komıssııasynyń quramyna Parlament Májilisine «AMANAT» partııasynan saılanǵan depýtattar Aıdos Sarym, Erlan Saırov, Janarbek Áshimjan, Qaınar Abasov, Artýr Platonov jáne táýelsiz sarapshylar men qoǵam qaıratkerleri Baqytjan Bazarbek, Marat Báshimov, Kırıll Pavlov, Marat Shıbutov, Maqsat Tolyqbaı taǵy basqalar kiredi.

Aıta ketsek, jer máselelerin neǵurlym jedel sheshý úshin qazaqstandyqtar barlyq zań buzý faktileri týraly «AMANAT» partııasynyń «Jedel jeli» 8 800 080 44 41 telefonyna habarlaı alady. Ótinimder WhatsApp arqyly da [phone] qabyldanady.