Qostanaı oblysynda 26 oqýshy koronavırýs juqtyrdy
«Óńirde sanıtarııalyq-epıdemıologııalyq jaǵdaıdyń nasharlaýy baıqalady. Kún saıynǵy monıtorıng nátıjeleri boıynsha sońǵy apta ishinde KVI juqtyrýdyń jańa jaǵdaılarynyń sany 18-den 60-qa deıin ósti. Ókinishke qaraı, 26 oqýshy indet juqtyryp aldy. Balalar koronavırýstyq ınfektsııanyń sımptosyz tasymaldaýshysy bolýy jáne óz jaqyndaryna juqtyrýy múmkin ekenin umytpaýymyz kerek», - dedi basqarma basshysy.
Elimizdiń bas memlekettik sanıtarlyq dárigeriniń 2020 jylǵy 2 qarashadaǵy № 62 qaýlysyna sáıkes, 2-toqsanda 300 oqýshyǵa deıin kontıngenti bar mektepterde, sany 15 adamǵa deıingi synyptarda dástúrli formatta oqytýǵa ruqsat berildi. Degenmen Qostanaı oblysy jańa oqytý formatyna kóshe almaıdy.
«Buǵan negizgi sebep balalar men mektep muǵalimderiniń densaýlyǵy bolyp otyr. Bizdiń oblysymyzda syrqattanýshylyq boıynsha jaǵdaı kúnnen-kúnge kúrdelene túsýde. Oblystyq jedel shtabynyń aǵymdaǵy jylǵy 10 qarashadaǵy otyrysynda balalardy І toqsanǵa uqsas oqytý týraly sheshim qabyldandy», - dedi Z.Báımenova.
Sonymen ekinshi toqsanda 336 mektep qatań sanıtarııalyq sharalardy saqtaı otyryp, shtattyq rejımde óz jumysyn bastaıdy. 64 myńnan asa oqýshy nemese bilim berý platformalaryn (Online Mektep, EduPage) paıdalana otyryp, qashyqtyq formatta oqýdy jalǵastyrady.
«Aǵymdaǵy jyly sanıtarııalyq-epıdemıologııalyq talaptardy saqtaý úshin oblys mektepterine taýarlar satyp alýǵa 343,6 mln. teńge bólingen. Qazirgi ýaqytta sanıtarlyq-gıgıenalyq quraldardyń jetkizilýi júzege asyrylýda. Mektepter ekinshi toqsanda sanıtaızerlermen, aıaq-kıimge arnalǵan zarazsyzdandyrýshy kilemshelermen, janaýsyz termometrlermen, aýany qaıta aınaldyrý quraldarmen, kvarts shamdarymen, antıseptıktermen, deohlormen tolyqtaı qamtamasyz etiledi», - dep túıdi ol.