Qostanaı oblysynda 200-den astam otbasyǵa azyq-túlik sebeti taratyldy

QOSTANAI. QazAqparat – Qostanaıda «Atameken» ulttyq kásipkerler palatasynyń uıymdastyrýmen qaıyrymdylyq aktsııasy bastaldy, dep habarlaıdy QazAqparat tilshisi.

Shara aıasynda jergilikti kásipkerler turmysy tómen 200-den astam otbasyǵa azyq-túlik sebetin taratyp berdi. Ár sebetke kúrish, un, makaron, jarma, jumyrtqa, ósimdik maıy, qant jáne jeke qorǵanysh quraldary salynǵan. Olardyń deni – jergilikti kásiporyndarda shyǵarylǵan azyq-túlik ónimderi.

«Aktsııa áýeli Nur-Sultanda bastalyp, keıin ózge aımaqtarda jalǵasty. Birazy aqshalaı kómek kórsetip jatyr. Al jergilikti kásiporyndar ózderi shyǵaratyn ónimderimen bólisti. Bulardyń bári eń birinshi kezekte qajet azyq-túlik. Sondaı-aq, keıbir kásiporyndar lımonad, ıogýrt, túrli tátti taǵamdaryn ákelip tapsyryp jatyr», - deıdi oblystyq kásipkerler palatasy dırektorynyń orynbasary Gennadıı Kýkoba.

Sharaǵa jeńil ónerkásippen aınalysatyn iri kásiporyndar da atsalysty. Máselen, jınalǵan azyq-túlik qory men qorǵanysh quraldary jurtqa taratylǵansha «Bolshevıchka» tigin fabrıkasynyń qoımasynda saqtalady. Atalmysh fabrıka aktsııany uıymdastyrýshylarǵa arnaıy kólik bólip, 2 myńdaı medıtsınalyq maska bergen.