Qostanaı oblysynda 137 myń adamnyń áli kúnge medıtsınalyq saqtandyrýy joq

QOSTANAI. QazAqparat - Qostanaı oblysynda 856 myńnan astam adam turady, sonyń ishinde16 paıyzy, ıaǵnı 137 myńnan astam azamat áli kúnge deıin medıtsınalyq saqtandyrylmaǵan, dep habarlaıdy QazAqparat.

«Áleýmettik medıtsınalyq saqtandyrý qorynyń Qostanaı oblysy boıynsha fılıaly saqtandyrylmaǵan azamattardyń «portretin» qurastyrdy. Bul tizimge jeke kásipkerler – 2,5%, derbes tóleýshiler – 1,5%, biryńǵaı jıyntyq tólem tóleýshiler – 4%, sondaı-aq azamattyq-quqyqtyq sharttar boıynsha jumys isteıtin qyzmetkerler men jeke tulǵalar –30% kirip otyr. Sońǵy 12 aıda oblysta 85 718 adam, ıaǵnı 62 paıyzy birde-bir tólem jasamaǵan», - dedi brıfıng kezinde qordyń Qostanaı fılıalynyń basshysy Batyrbek Nurǵalıev.

Saqtandyrylǵan azamattardyń eń az úlesi Qostanaı qalasynda, Denısovskıı, Fedorov, Sarykól, Altynsarın, Qarabalyq jáne Áýlıekól aýdandarynda tirkelgen.

«Sońǵy 12 aıda mindetti medıtsınalyq saqtandyrýǵa jarna tólemegenderdiń arasynda kim bar? Bul, eń aldymen, jeke sharýa júrgizýshiler, tirkelmegen azamattar, jumyssyzdar, úı sharýasyndaǵy áıelder. Olar úshin jarna tóleýden góri, biryńǵaı jıyntyq tólemdi (BJT) júıeli túrde tóleý arqyly MÁMS júıesinde mártebe alý áldeqaıda tıimdi. Óıtkeni jarna arqyly mártebe alý úshin aldyńǵy 12 aı (bir rettik – 29 875 teńge) tóleý qajet bolady. BJT tóleý arqyly aýyl turǵyny úshin soma 4 596 teńgeni (aıyna 1 532 teńge) quraıdy, bul 6 eseden astam arzanyraq», - dep túsindirdi B.Nurǵalıev.