Qostanaı oblysynda 1 mln tekshe metrden astam qar shyǵaryldy
Oblystyq tótenshe jaǵdaılar departamenti habarlaǵandaı, sý tasqyny kezeńindegi tótenshe jaǵdaılardyń aldyn alýǵa arnalǵan osy jyldyń is-sharalar jospary daıyn.
Onda uıymdastyrýshylyq jáne praktıkalyq sharalardyń barlyq kesheni qarastyrylǵan.
«3 naýryzdan bastap azamattyq qorǵaýdyń memlekettik júıesiniń oblystyq aýmaqtyq kishi júıesi kúndelikti qyzmet rejıminen erekshe ókimge deıingi joǵary daıyndyq rejımine aýystyryldy. Sý tasqyny jaǵdaıyn baqylaý, basqarý organdarynyń is-qımylyn úılestirý úshin departament bazasynda múddeli azamattyq qorǵaý qyzmetterin tarta otyryp, oblystyq sý tasqynyna qarsy shtab qurylady» dep habarlady tótenshe jaǵdaılar departamenti.
Osy jumys aıasynda qalalar men aýdandardyń ákimderine, mekemeler men uıymdardyń basshylaryna bógetter men bógetterdiń jaı-kúıine turaqty tekserý júrgizý, sý ótkizý qurylystaryn, avtomobıl joldaryn, ǵımarattar men qurylystardyń shatyrlaryn qardan tazartý qajettigi týraly aıtyldy.
Sondaı-aq sý tasqyny kezeńinde gıdrotehnıkalyq qurylystary bar sý qoımalarynda táýlik boıy kezekshilik etetin baqylaý beketteri qoıylady, al óńirdiń sý qoımalarynda muzdy qopsytý boıynsha jarylys jumystary júrgiziledi.
«Búgingi tańda qalalar men aýdan ortalyqtarynyń aýmaǵynan 1 mln 100 myń tekshe metrden astam qar shyǵaryldy. Osy baǵyttaǵy jumystar jalǵasýda. Oblys ózenderiniń deńgeıi men qardyń erýine turaqty baqylaý júrgiziledi. Joǵarǵy Tobyl, Qaratomar, Jelqýar, Joǵarǵy Shortandy sý qoımalary erekshe baqylaýǵa alyndy jáne bógetterdiń buzylý qaýpin týdyrmas úshin ýaqtyly aǵyzý boıynsha sharalar qabyldandy», – dep tolyqtyrdy Tótenshe jaǵdaılar departamenti.
Kóktemgi sý tasqyny kezeńinde Qostanaı oblysynyń aýmaǵynda táýlik boıy kezekshiligi bar 26 gıdrobekettiń jumysyn uıymdastyrý josparlanýda.