Qostanaı oblysynda 1,7 myń «qyzyl» jáne 904 «sary» mártebesi bar adam anyqtaldy

QOSTANAI. QazAqparat - Qostanaı oblysynda Ashyq jobasymen 5 131 shaǵyn jáne orta bıznes sýbektisi jumys isteıdi, dep habarlaıdy QazAqparat Sanıtarııalyq-epıdemıologııalyq baqylaý komıtetine silteme jasap.

Vedomstvonyń málimetinshe, olardyń 5 105-i qatysýshy bolsa, 26-sy test rejımde qyzmet etýde. Koronavırýs ınfektsııasynyń taralýyna qarsy kúreste monıtorıng toptary da kómektesedi. Jumys bastalǵannan beri shekteý sharasyn saqtaý boıynsha 2 808 nysan qamtylyp, 14 320 reıd júrgizilgen.

Oblystyq sanıtarııalyq-epıdemıologııalyq baqylaý departament «qyzyl» mártebesi bar úı karantınin buzatyndar sany artyp kele jatqanyn aıtady.

«Ashyq jobasy Qostanaı oblysynda oqshaýlaý rejımin buzǵan 1 723 «qyzyl» KVI jáne 904 «sary» mártebesi bar adamdy anyqtaǵan. Tek sońǵy aptada 27 adam ákimshilik jaýapkershilikke tartylyp, 30 AEK kóleminde aıyppul salynǵan. Negizinen bul Rýdnyı qalasynyń turǵyndary», delingen habarlamada.

Sáýir aıynan bastap búgingi kúnge deıin Ashyq qosymshasy arqyly jumys isteıtin nysandarda «qyzyl» mártebesi bar 163 úı karantınin buzýshy anyqtaldy.

Barlyq turǵyn QR ÁQBtK-niń 425-babynyń 1-bóligi boıynsha ákimshilik jaýapkershilikke tartylyp, aıyppul salyndy.