Qostanaı oblysyna vaktsınanyń 1200 danasy jetkizildi

​QOSTANAI. QazAqparat – Qostanaı oblysynda koronavırýstyq ınfektsııaǵa qarsy vaktsınalaý boıynsha daıyndyq jumystary aıaqtaldy, dep habarlaıdy QazAqparat oblystyq densaýlyq saqtaý basqarmasynyń baspasóz qyzmetine silteme jasap.

Oblystyq densaýlyq saqtaý basqarmasynyń dári-dármek saıasaty bóliminiń basshysy Gúlnar Ospanovanyń aıtýynsha, búgin aımaqqa vaktsınanyń 1200 dozasy ákelindi. Vaktsına júrgizýge barlyǵy 31 medıtsınalyq mekeme jumyldyrylady. Onyń ishinde 26 memlekettik, 5 jekemenshik emhana bar.

«Vaktsına temperatýralyq rejımdi saqtaı otyryp jetkizildi. Endi vaktsınanyń oblystyń barlyq emhanalary alady. Vaktsınatsııa tegin jáne erikti túrde ótedi. Eger bul naýqanǵa qatysqyńyz kelmese, jazbasha túrde bas tartasyz. 18 jasqa deıingi balalar men 65 jastan asqan adamdar egilmeıdi. Naýryz aıynda egý protsesinen muǵalimder ótedi», - deıdi G.Ospanova.

Búgin dárigerler men sanepıdbaqylaý departamentiniń qyzmetkerleri vaktsına qabyldamaq.

Qostanaı qalasynan shalǵaı aýyldarǵa vaktsına tasymaldaıtyn avtorefrıjerator jáne sýyq saqtaǵysh qabileti bar 100 termokonteıner satyp alyndy.

Aıta keteıik, búgin Qazaqstanda koronavırýs ınfektsııasyn juqtyrý jáne taratý táýekeli joǵary sanattardy koronavırýsqa qarsy vaktsınalaý bastaldy. Qazaqstanda vaktsına erikti túrde salynady.

31 qańtarda Qaraǵandy farmatsevtıkalyq kesheni elge «Spýtnık V» vaktsınalarynyń alǵashqy partııasyn jetkizdi. Aqpan aıynda Qaraǵandy farmatsevtıkalyq kesheni vaktsınanyń 112 myń dozasyn , naýryzda – 150 myń doza , sáýirden maýsymǵa deıin – aı saıyn 600 myń dozadan jetkizetin bolady .