Qostanaı oblysyna esirtki jetkizip júrgen 6 adam ustaldy
Qostanaı oblysynda polıtsııa qyzmetkerleri oblystyń birneshe óńirinde esirtki satýshylardy ustaý boıynsha arnaıy operatsııa júrgizdi.
Uıymdasqan qylmysqa qarsy kúres basqarmasynyń qyzmetkerleri jedel-izdestirý is-sharalary barysynda 6 kúdiktini ustady. Onyń beseýi ýaqytsha ustaý ızolıatoryna qamaldy. Operatsııa bir mezgilde Rýdnyı, Lısakov qalalarynda jáne Qostanaı aýdanynda ótti.
Uıymdasqan qylmysqa qarsy kúres basqarmasynyń bastyǵy Serik Baıgonovtyń aıtýynsha, polıtsııa qyzmetkerleri sanktsııalanǵan tintý júrgizý barysynda zańsyz aınalymnan ósimdik tektes esirtki zattary, aqsha qarajaty, onyń ishinde shetel valıýtasy, temeki shegetin tútikter tárkilendi.
Osy derek boıynsha polıtsııa QR QK-niń 297-babynyń 3-bóliminde kózdelgen (Esirtki zattaryn, olardyń analogtaryn ótkizý maqsatynda zańsyz daıyndaý, óńdeý jáne saqtaý, tasymaldaý) sotqa deıingi tergep-tekserýdi bastady. Baptyń sanktsııasy múlki tárkilenip, on jyldan on bes jylǵa deıingi merzimge bas bostandyǵynan aıyrýdy kózdeıdi.
Tergeý barysynda kúdiktilerdiń oblystyń qalalary men aýdandarynyń aýmaǵynda esirtki satqany, olardyń jumysy úılestirilgeni anyqtaldy. Qazirgi ýaqytta saraptamalar taǵaıyndalyp, qajetti tergeý áreketteri júrgizilip jatyr.