Qostanaı oblysy: Jyldyń jeti jańalyǵy
Prezıdent qostanaılyq jastarmen kezdesti
Qostanaıǵa jumys saparymen kelgen Memleket basshysy Qasym-Jomart Toqaev Qazaqstan-Reseı jastarynyń halyqaralyq forýmyna qatysty. Prezıdent áýeli forým aıasynda ashylǵan jastardyń ınnovatsııalyq jobalary kórmesin tamashalaǵan bolatyn. Forým barysynda birqatar belsendi jas sóz alyp, oblysta jastardyń kásipkerlikpen aınalysýyna, bilim alýyna, jumysqa ornalasyp, tabys tabýyna múmkindik bar ekenin tilge tıek etti. Prezıdent elimizdiń ozyq oıly jastary ǵylymda, ІT-tehnologııada, mádenıet, bıznes jáne sportta – jalpy kez kelgen salada joǵarǵy nátıjelerge qol jetkizip júrgenin atap ótti.
- Qazaqstan jastary – bilimdi, jan-jaqty damyǵan ári daryndy. Elimizdiń bolashaǵy senderdiń qoldaryńda. Sol sebepti buǵan qostanaılyq jastar, myna sizder úles qosýlaryńyz qajet. Elbasymyz Nursultan Nazarbaev jarııalaǵan bıylǵy Jastar jyly óskeleń urpaqtyń búgini men keleshegine tyń serpin berip, jastardyń áleýetin arttyrýǵa múmkindik týǵyzady. Men prezıdent retinde eriktiler qozǵalysyn qoldaımyn. 2020 jyldy «Erikti jastar jyly» dep ataý týraly bastamaǵa da tolyq qoldaý bildiremin, – degen bolatyn Memleket basshysy.
Sondaı-aq, ol volonterlik týraly zań qabyldanyp, eriktiler mártebesi zańdastyrylatynyn málimdedi. Q.Toqaev sóz sońynda «Jyl volonteri» halyqaralyq syılyǵy taǵaıyndalyp, bul jastardy patrıotızmge yntalandyratynyn aıtty.
Traktor zaýyty ashyldy
Qostanaıdaǵy ındýstrıaldy aımaqtyń basty jańalyǵy – traktor zaýytynyń ashylýy. Saltanatty sharaǵa Úkimet basshysy Asqar Mamın qatysqan bolatyn. Asqar Mamın «Peterbýrg traktor zaýyty» AQ dırektory Sergeı Serebrıakovpen kezdesý ótkizip, QR men RF aýyl sharýashylyǵy mashınasyn jasaý salasyndaǵy birlesken jobalaryn talqylady.
Jańa traktor zaýyty jylyna 500-den 700-ge deıin alyp traktor qurastyrýǵa qaýqarly. Nátıjesinde eldegi aýyl sharýashylyǵy tehnıkalarynyń óndirisi jańa qarqyn alady. Sonymen qatar oblysta 500 turaqty jumys orny ashyldy.
Qostanaı qalasyna 140 jyl
Bıyl Qostanaı qalasynyń qurylǵanyna 140 jyl toldy. Bul ataýly data oblys ortalyǵynda sán-saltanatymen atap ótildi. Mereıtoı óńir turǵyndaryna rýhanı demalys syılaǵan mádenı sharalarǵa toly boldy. Aıtalyq, kórermenderge arnalyp Abaı atyndaǵy opera jáne balet teatry ónerpazdarynyń «Shámshi álemi» atty kontserti, «Jańa nomad» etno-festıvali, «Uly dala órkenıeti» kórmesi, «Altyn aımaq – Qostanaıym» mereıtoılyq baıqaýlar
Jańa nysan – Jastar saraıy
Bıyl oblys ortalyǵynda Jastar saraıy ashyldy. Ulttyq-mádenı ortalyqtyń qurylysyna 2 mlrd teńge jumsaldy. Syıymdylyǵy keń mundaı nysan Qostanaıda buryn-sońdy bolmaǵan. Jańa ortalyqtaǵy kontsert zaly bir ýaqytta 1000 adamdy qonaq ete alady. Bul saraı ashylǵaly beri halyqaralyq, respýblıkalyq, oblystyń mańyzdaǵy túrli saıası, mádenı, rýhanı sharalar ótip keledi.
Aýdan ataýy ózgerdi
Osy ýaqytqa deıin Lavrentıı Tarannyń esimimen atalyp kelgen aýdanǵa áıgili jazýshy Beıimbet Maılınniń esimi berildi. Bul týraly QR Prezıdenti Q.Toqaevtyń qaýlysy jarııa etildi.
«Qazaqstan Respýblıkasynyń ákimshilik-aýmaqtyq qurylysy týraly» 1993 jylǵy 8 jeltoqsandaǵy Qazaqstan Respýblıkasy Zańynyń 9-babyna sáıkes QAÝLY ETEMІN: Qostanaı oblysynyń Taran aýdany Beıimbet Maılın aýdany bolyp qaıta atalsyn. Osy Jarlyq alǵashqy resmı jarııalanǵan kúninen bastap qoldanysqa engiziledi», - delindi jarlyqta.
Bul 26 myńnan astam turǵyny bar aýdannyń tarıhyndaǵy eń eleýli oqıǵa boldy. Munymen qosa, Aýdan ortalyǵynyń ataýy Áıet bolyp ózgertildi.
Aıta keteıik, bul aýdan – oblystyń soltústik-batysynda ornalasqan ákimshilik aýmaqtyq bólik. 1936 jyly qurylǵan. Aýdandaǵy 52 eldi meken bir kent, 15 aýyl okrýgine biriktirilgen.
Mektep sany kóbeıdi
Memleket basshysy Qasym-Jomart Toqaev Qostanaıdaǵy qazaq tilinde bilim beretin jalǵyz bastaýysh mektebindegi kúrdeli jaǵdaıǵa baılanysty alańdaýshylyq bildirgen-di. Keıin bul másele sheshilip, oblys ortalyǵynda qazaq tilinde bilim beretin №28 mektep-gımnazııasy ashyldy. Bul nysan osyǵan deıin kásiptik-tehnıkalyq kolledj bolǵan-dy, orta bilim oshaǵyna laıyqtalyp, jóndeý jumystary júrgizildi. Osylaısha, oblys ortalyǵynyń 140 jyldyǵyna oraı 900 oryndyq úsh qabatty nysan qarasha aıynda paıdalanýǵa berildi. Jóndeý jumystaryna 250 mln teńge jumsaldy. Onyń 95 mıllıony – demeýshiler qarjysy. 160 oryndyq ashana, mýzyka, horegrafııa, sport, akt zaldary, dálizder ádemi keıipke engen. Bul – Qostanaı qalasyndaǵy memlekettik tilde bilim beretin 7-shi mektep.
Et kombınaty iske qosyldy
Qostanaı oblysynyń Qarabalyq aýdanynda et ónimderin shyǵaratyn kombınat paıdalanýǵa berildi. Kombınat otandyq ónimderdiń naryqqa shyǵýyn qamtamasyz etse, ekinshiden, aýdan turǵyndaryn jańa jumys oryndaryna ornalastyrýǵa oń jaǵdaı týǵyzdy. Búginge deıin bul kombınattyń jumysy 15 jyl boıy turalap qalǵan bolatyn. Nysandy qalpyna keltirý jumystaryna 11 mln teńge jeke qarajat jumsaldy. Qazirgi tańda munda 50 adam turaqty jumyspen qamtylyp otyr.Búginde munda 50 adam eńbek etkenimen, kombınat barlyǵy 120 adamdy jumyspen qamtýǵa qaýqarly. Nysan keler jyldyń mamyr aıynda tolyq qýatyna kóship, aýdannyń taǵy 70 turǵyny kombınat qyzmetkeri atanady.
Budan ózge oblysta tuńǵysh ret «qyzǵaldaqtar festıvali» ótti. Qyzǵaldaqtar festıvaliniń basty jańalyǵy - aýdanda tuńǵysh ret 500 dombyrashynyń qatysýymen kúı oınaldy.
Sonymen qatar, jylaıryqtaǵy bir eleýli oqıǵa – Rýdnyı qalasynyń Qashar kentinde 20 mln jyl buryn tirshilik etken balyq súıeginiń tabylýy. Ejelgi zamanda tirshilik etken balyqty «Kapıtal Avto» kompanııasynyń qyzmetkerleri ekskavatormen qazyp jatqanda baıqap qalǵan. Balyqtyń paleogen kezeńinde, shamamen 20 mln jyl buryn tirshilik etkeni anyqtaldy.