Qostanaı oblysy azyq-túlik eksportqa shyǵarýda birinshi orynǵa shyqty

NUR-SULTAN. QazAqparat – 2020 jyly Qostanaı oblysy 300 mln dollardyń azyq-túligin eksportqa shyǵardy. Bul týraly Qostanaı oblysynyń ákimi Arhımed Muhambetov aıtty, dep habarlaıdy QazAqparat tilshisi.

«Aýyl sharýashylyǵy oblys ekonomıkasyndaǵy ekinshi bazalyq baǵyt sanalady. Salada 117 myńnan astam adam eńbek etedi. Bul oblystyń jumyspen qamtylǵan halqynyń jalpy sanynyń 25 paıyzyn quraıdy. 2020 jyly 4 mln tonna astyq bastyrdyq. Bıyl jazǵy egistik alqaby 4,7 mln gektardy qurady. Onyń ishinde 3,9 mln gektar astyq jáne dándi-burshaqty daqyldar, 590 myń gektar maıly daqyldar bar. Sońǵy 5 jylda egistik alqaptary qurylymyn ártaraptandyrý aıasynda maıly daqyldar alqaby 1,7 esege artyp, dándi-burshaqty daqyldar alqaby qysqartyldy», - dedi oblys basshysy Ortalyq kommýnıkatsıylar qyzmetindegi baspasóz máslıhatynda.

Onyń atap ótýinshe, bıyl óńirde agroónerkásip keshenin damytýǵa 31,2 mlrd teńge bólindi. Nátıjesinde et óndirisi 4,7, al sút 2,5 paıyzǵa artyp otyr. Bólingen qarajat tolyq kólemde ıgeriletin bolady.

«2020 jyly oblys azyq-túlik ónimderin eksporttaýda respýblıkada birinshi orynǵa shyqty. Elimizden tysqary aýmaqqa 300 mln dollardyń azyq-túligin eksportqa shyǵardyq. Bir jyldyń ishinde 1 mln tonna astyq daqylyn, 800 myń tonna ún, 10 myń tonna ósimdik maıyn, shamamen 8 myń tonna sútónimderin, 416 tonna et jáne et ónimderin, 51 mln dana jumyrtqa jáne basqa da azyq-túlik jiberdik», - dedi Arhımed Muhambetov.