Qostanaı oblysy Arystaǵy úılerdi jóndeýge 500 mln teńge aýdarady
Oblys ákimdigi depýtattarǵa únemdelgen 2 mlrd teńgeden astam bıýdjet qarajatyn qajetti baǵyttarǵa bólýdi usyndy. Ekonomıka jáne bıýdjettik josparlaý basqarmasynyń basshysy Gúlbaram Musaǵazınanyń aıtýynsha, bul qarjy memlekettik satyp alý nátıjeleri boıynsha únemdeldi, sondaı-aq bıýdjettiń kiris bóligi de ulǵaıǵan.
«Qostanaı oblysynyń bıýdjetinen 500 mln teńge Arys qalasyndaǵy qıraǵan úılerdi qalpyna keltirýge jumsalady. Budan bólek, 2019-2021 jyldarǵa josparlanǵan bıýdjet qarjysy esebinen 135,7 mln teńge múmkindigi shekteýli jandarǵa arnalǵan oblystyq beıimdeý ortalyǵynyń ǵımaratyn qaıta jańǵyrtýǵa qarastyrylady. «ıÝbıleınyı» shaǵyn aýdanynda jylý qubyrlaryn tartý jumystary jalǵasýda. Bul maqsatqa 140 mln teńge bólip otyrmyz. Qostanaıdaǵy №2 jylý qazandyǵyn kúrdeli jóndeýden ótkizýge 325,5 mln teńge qarjy bólinedi», - dedi Gúlbaram Musaǵazına.
Sondaı-aq Beıimbet Maılın, Meńdiqara, Denısov aýdandaryndaǵy birqatar eldi mekenderdi aýyz sýmen qamtý jumystaryna 190,5 mln teńge qarjy bólý kózdelip otyr. 12 eldi mekenge aýyz sý qubyryn tartý úshin joba-smetalyq qujattary ázirlenedi. Qostanaı aýdanyna qarasty Ozernyı, Shemenov eldi mekenderine joǵary qysymdy gaz qubyryn ótkizý jumystaryna da qomaqty qarjy bólinbek. Óńir turǵyndaryn áleýmettik qoldaý sharalary da birinshi kezekte turǵan másele. Bıyl turmysy tómen otbasylarǵa beriletin ataýly áleýmettik kómekke oblys bıýdjetinen 318 mln teńge qarastyrylǵan. Bilim salasyna da bólingen qarjy qomaqty. Máselen, jańa oqý jylyna deıin 153,1 mln teńgege jańartylǵan mazmundaǵy oqýlyqtar satylyp alynyp, Arqalyq qalasy men Qostanaı, Qarasý aýdandaryna jóneltiledi.
«Polıtsııa departamenti Rýdnyıda ákimshilik jazaǵa tartylǵandardy qabyldaý jáne ustaý ornyn qurýǵa 13,3 mln teńge alady. Dene shynyqtyrý jáne sport basqarmasyna trıatlonnan jattyqtyrýshy, oqytýshylardyń eki qosymsha stavkasyn engizýge jáne jarystarǵa qatysýǵa 8,8 mln teńge bólinedi», - dep usynys bildirdi basqarma basshysy.
Depýtattar usynylǵan bıýdjet qarajatyn biraýyzdan maquldady. Sonymen qatar, máslıhat otyrysy 4 adamǵa «Qostanaı oblysynyń qurmetti azamaty» ataǵyn berý týraly sheshimdi qabyldady. Olardyń ishinde belgili aqyn Jolbarys Baıazıd, kásipker Serikbaı Bısetaev, zańger Sergeı Jalybın, uzaq jyldar Jitiqara aýdanyn basqarǵan Rızvan Murtazınder bar.